ABŞ-ın Nyu-Cersi ştatından olan Matthews-Reshler (Metyus-Reşler) ailəsi üçün zibil qutularında faydalı əşyalar axtarmaq təkcə pula qənaət etmək deyil, həm də ailə ənənəsi və xatirəyə hörmətdir. Cütlük bu yaxınlarda sosial mediada “Dollar General” mağazasının qarşısındakı tapıntılarını paylaşaraq sosial şəbəkə istifadəçilərini təəccübləndirib.

Sfera.az bildirir ki, ailə tapdıqları hər şeyi dezinfeksiya edir və çeşidləyir: bir qismini özləri üçün götürür, bir qismini dostlarına verir, qalanını isə yerli camaata və evsizlərə bağışlayır. Bu missiya onlara babalarından miras qalıb.

Culiya Metyus-Reşler mediaya müsahibəsində: "Babam Corc Metyus Elizabethdəki ailəsini dəstəkləmək üçün atılmış əşyaları toplayıb. Maddi vəziyyəti yaxşılaşdıqda, ətraf mühit üçün narahat olduğu üçün bu ənənəni davam etdirib" - deyə bildirib.

2020-ci ilin aprelində babasının ölümündən sonra Culiya və əri Brandon bu missiyanı davam etdiriblər. "Hər dəfə zibil qutusuna söykənəndə onun gülümsədiyini təsəvvür edirəm. Bilirəm ki, kiçik, lakin vacib bir iş görürəm" - deyə qadın paylaşıb.

Amerikalı cütlüyün son tapıntısı “Dollar General” mağazasından kənarda tapılan təxminən 600 dollar dəyərində açılmamış mal olub. Xüsusilə bir çox məhsulun istifadə müddəti bitməməsi cütlüyü heyrətləndirib.

"Məhsulların yarısı istifadə müddətinin bitməsinə bir neçə gün qaldığı üçün atılmışdı. “Ən köhnə” tarixi 2025-ci ilin yanvar ayının əvvəli idi. Bununla belə, bəzi məhsulların 2025-ci ilin oktyabrına qədər vaxtı var idi" - deyə Culiya qeyd edib.

Tapıntılar bəzən kədərə səbəb olur

Onun sözlərinə görə, belə tapıntılar təkcə sevinc deyil, həm də kədərləndirir. Xanım Metyus-Reşler əlavə edir: "Bir tərəfdən yemək, dizayner geyimləri və zəruri əşyalar tapmaq gözəldir. Digər tərəfdən, biz israfın həcmindən narahatıq".

Ailə tapdıqları hər şeyi dezinfeksiya edir və çeşidləyir: bir qismini özləri üçün götürür, bir qismini dostlarına verir, qalanını isə yerli camaata və evsizlərə bağışlayır.

"Brandon və mən bir zibil qabından yüzlərlə dollar dəyərində yeni mal çıxarmaq üçün orta hesabla 5 dəqiqə vaxt sərf edirik. Sizcə, Amerikada nə qədər zibil qutusu var? Bəs bütün dünyada? Bütün bu zibillər hara gedir? Problem nədir? Həddindən artıq istehsal və həddindən artıq istehlak böyük problemdir" - deyə Culiya vurğulayır.

Cütlük tapdıqlarını “TikTok” və bəzi forumlarda paylaşaraq dünyanın hər yerindən dəstək şərhləri alır.

Aysel

Cütlük zibil qutularından topladıqları ilə xeyriyyəçilik edir - FOTO