ABŞ Husiləri sıxışdırır - İran masaya oturacaqmı?

ABŞ-nin Yəməndə İran tərəfindən dəstəklənən Husilərə qarşı hərbi əməliyyatlara başlaması regionda vəziyyəti daha da gərginləşdirib. Vaşinqtonun bu addımı təkcə Husiləri cəzalandırmaq deyil, həm də İranı təzyiq altına almaq məqsədi güdür. 

Sfera.az-a açıqlama verən politoloq Tural İsmayılov xatırlatdı ki, Husilər Qırmızı dənizdəki ticarət yollarına ciddi problemlər yaradırdılar.

Politoloq söylədi ki, Husilərin Yəməndə hakimiyyətdə olması regionun sabitliyinə mənfi təsir göstərib. O bildirib ki, İranın dəstəklədiyi qüvvələr, o cümlədən Livandakı Hizbullah Yaxın Şərqin qeyri-sabit bir bölgəyə çevrilməsində mühüm rol oynayır:

“Husilər uzun müddət ABŞ-yə məxsus yük gəmilərinə hücumlar təşkil edirdi. Buna görə ABŞ onları dəfələrlə xəbərdar etsə də, Husilər bu xəbərdarlıqlara məhəl qoymadı. Nəticədə, Tramp Administrasiyası Husilərə qarşı konkret və praktik addımlar atmaq qərarına gəldi”. 

T.İsmayılovun fikrincə, ABŞ-nin bu əməliyyatlarla əsas məqsədlərindən biri gücünü nümayiş etdirməkdir:

“Vaşinqton mesaj verir ki, Qırmızı dənizdə, bölgədə və ABŞ-nin müttəfiqlərinə qarşı Husilər tərəfindən həyata keçiriləcək hər hansı təxribatın qarşısı sərt şəkildə alınacaq. ABŞ-nin bu addımlarının ikinci məqsədi İranı nüvə danışıqları mövzusunda masa arxasına gətirməkdir”. 

Onun sözlərinə görə, Tramp Administrasiyası dövründə İran münasibətlərdə sərt mövqe nümayiş etdirirdi və bu, yeni administrasiya üçün əsas problemlərdən biri olub. Hazırda Yəməndə aparılan əməliyyatların həm İranın dəstəklədiyi qüvvələri zəiflətmək, həm də Tehrana xəbərdarlıq etmək məqsədi daşıdığı bildirilib. 

Bəsti Rəfizadə