“Putin atəşkəs təklifini rədd etməyə hazırlaşır” - Zelenski

Ukrayna Prezidenti Volodimir Zelenski Rusiya Prezidenti Vladimir Putinin ABŞ tərəfindən irəli sürülən “30 günlük atəşkəs” təklifini rədd etməyə hazırlaşdığını iddia edib.

Sfera.az xəbər verir ki, Zelenski “X” hesabında yazdığı açıqlamada bu haqda danışıb.

O bildirib ki, Rusiya tərəfi atəşkəs ideyasına cavab olaraq çox proqnozlaşdırıla bilən və manipulyativ açıqlamalar verir. Ukrayna lideri həmçinin iddia edib ki, Putin belə situasiyalarda məntiqi həllərin reallaşmasına əngəl yaratmağa çalışır:

“Əlbəttə, Putin prezident Trampa bu müharibəni davam etdirmək və ukraynalıları öldürmək istədiyini birbaşa söyləməkdən qorxur. Ona görə də Moskvada atəşkəs ideyasını elə ilkin şərtlərlə əhatə edirlər ki, bu ya uğursuz olur, ya da mümkün qədər uzun müddətə uzadılır”.

Zelenski ABŞ-nin dərhal atəşkəs əldə olunacağı təqdirdə vəziyyətə nəzarət edə biləcəyini qeyd edib. Rusiya tərəfinin müharibəni davam etdirməkdə israrlı olduğunu vurğulayan Zelenski Putinin illərdir sülhdən imtina etdiyini bildirib. Onun fikrincə, davamlı sülh üçün Rusiyaya qarşı sanksiyaların hesabına təzyiq artırılmalıdır.

Qeyd edək ki, Putin Ukraynada müvəqqəti atəşkəs təkliflərini dəstəklədiyini, lakin bu cəhdlərin uzunmüddətli sülhə və böhrana səbəb olan problemlərin həllinə imkan yaratmalı olduğunu bildirib.

Fidan Hacızadə