Güzgüyə baxdığınız zaman, demək olar ki, bütün üzünüzün tüklərlə örtüldüyünü təsəvvür edin. Bunu görənlər əvvəlcə təəccüblənir, sonra maraqla sizə suallar verirlər. 18 yaşlı Lalit Patidar üçün bu vəziyyət gündəlik həyatın bir parçasıdır. Gənc yaşlarından diqqət çəkən görünüşü ilə insanların diqqət mərkəzinə çevrilən Patidar indi özünü olduğu kimi qəbul edərək dünyaya nümunə olub. Üstəlik, hətta Ginnesin Rekordlar Kitabına düşən bu nadir vəziyyətin elmi izahı var.

Sfera.az bildirir ki, Lalit Patidarın Ginnesin Rekordlar Kitabına düşməsinə səbəb hipertrikoz adlanan olduqca nadir xəstəlikdir.

Xalq arasında “qurd canavar sindromu” olaraq da bilinən bu vəziyyət müəyyən nahiyələrdə və ya bədənin hər yerində həddindən artıq tüklənməyə səbəb olur.

Patidarın vəziyyəti elm adamlarının "anadangəlmə hipertrikoz terminalis" kimi təsvir etdiyi şeydir. Bu o deməkdir ki, bu vəziyyət doğuşdan mövcuddur və həyat boyu davam edir. Ginnesin Dünya Rekordları Patidarın üzünün 95%-nin saçla örtüldüyünü təsdiqləyib ki, bu da onu Orta əsrlərdən bəri qeydə alınan 50 nəfərdən biri edib.

Hipertrikoz yalnız üz nahiyəsində deyil, bütün bədəndə anormal tük artımına səbəb ola bilər.

Sindromun səbəbləri tam məlum olmasa da, elm adamları bunun insan təkamülündə köhnə genlərin təsadüfən yenidən aktivləşməsi ilə bağlı ola biləcəyini düşünür. Hipertrikoz müəyyən hallarda yalnız müəyyən bölgələrdə (nevus hipertrikozu) və ya xəstəlik, dərman və ya hormonal pozğunluq (qazanılmış hipertrikoz) nəticəsində baş verə bilər.

Lakin Patidarın vəziyyəti anadangəlmə olduğu üçün ömrü boyu tükləri uzanmağa davam edəcək. Bu vəziyyətin məlum qəti müalicəsi yoxdur. Lazer epilyasiya və ya digər tibbi müdaxilələrlə tükləri müvəqqəti olaraq azaltmaq mümkün olsa da, hipertrikozun radikal həlli hələ tapılmayıb.

Alimlər hipertrikozun dəqiq səbəbini bilmirlər.

Ancaq ən çox yayılmış nəzəriyyələrdən biri, insanın təkamülünün köhnə genlərinin təsadüfən yenidən aktivləşməsidir. Erkən insan əcdadlarında bədən tükləri yaşamaq üçün vacib idi, lakin zaman keçdikcə bu genlər deaktiv edilib.

Ancaq bəzi insanlarda bu köhnə genlər səhvən yenidən aktivləşə və tük böyüməsini idarə edən mexanizmlərdə anormal bir artıma səbəb ola bilər. Lalit Patidar bu nadir genetik hadisənin canlı nümunələrindən biridir.

Gənc yaşlarında Patidar üçün həyat asan olmayıb

Uşaq ikən məktəb yoldaşları ona başqa cür baxırdılar, hətta bəziləri ondan qorxurdular. Lakin zaman keçdikcə insanlar onun xarici görünüşündən də üstün bir şəxsiyyət olduğunu başa düşdülər.

Bu gün Patidar özünü olduğu kimi qəbul edən, özünə inamı ilə diqqət çəkən biridir. “YouTube” və “İnstaqram”da böyük izləyicisi olan gənc gündəlik həyatını paylaşaraq insanları ruhlandırır. Onun “YouTube”da 108.000, “İnstaqram”da isə 265.000 izləyicisi var.

Bəs, bu xəstəlikdən başqa kimlər əziyyət çəkir?

Hipertrikozun bir neçə fərqli növü var və hər biri fərqli simptomlarla özünü göstərir:

Konjenital Hipertrikoz Lanuginosa: Yeni doğulmuş körpələrdə normal olaraq tökülməsi lazım olan yumşaq tüklər yox olmadıqda meydana gəlir.
Konjenital Hipertrikoz Terminalis: Doğuşdan uzun və qalın tüklərin uzanmasına səbəb olur. Patidarın yaşadığı vəziyyət budur.

Nevus hipertrikozu: Müəyyən bölgələrdə həddindən artıq tüklənmə müşahidə olunur.

Qazanılmış Hipertrikoz: Sonradan inkişaf edən, bəzi xəstəliklər və ya dərmanlar səbəbiylə meydana gələ bilən bir növdür.

Onu da qeyd edək ki bu xəstəlik o qədər nadirdir ki, dünyada yalnız bir neçə insanda var.

Aysel

Dünyanın ən tüklü üzünə sahib olmaqla Ginnesin Rekordlar Kitabına düşdü