Kreml Putinlə Tramp arasında telefon danışığının mümkünlüyünü bildirib.

Sfera.az xəbər verir ki, bu barədə Rusiya prezidentinin mətbuat katibi Dmitri Peskov məlumat verib.

"Kreml Rusiya Prezidenti Vladimir Putinlə amerikalı həmkarı Donald Tramp arasında telefon danışığı məsələsinin ABŞ-Ukrayna danışıqlarından sonra gündəmə gələ biləcəyini və tez bir zamanda təşkil oluna biləcəyini istisna etmir. Biz həmçinin ən yüksək səviyyədə çağırış mövzusunun yarana biləcəyini də istisna etmirik. Belə bir ehtiyac yaranarsa, bu, çox tez təşkil olunacaq. Amerikalılarla mövcud dialoq kanalları bunu nisbətən qısa müddətdə həyata keçirməyə imkan verir", - o deyib.

Qeyd edək ki, martın 11-də Səudiyyə Ərəbistanının Ciddə şəhərində ABŞ və Ukrayna nümayəndə heyətləri arasında danışıqlar 9,5 saat davam edib. Danışıqların ardınca Volodimir Zelenskinin saytında birgə bəyanat dərc edilib. Bəyanatda bildirilir ki, Ukrayna ABŞ-nin 30 günlük atəşkəs təklifini qəbul etməyə hazırdır, Vaşinqton dərhal kəşfiyyat məlumatlarının verilməsində fasiləni aradan qaldıracaq və Kiyevə yardımı bərpa edəcək.

Həmçinin bildirilib ki, ölkələr Ukrayna iqtisadiyyatını gücləndirmək üçün ən qısa zamanda mühüm mineral ehtiyatların işlənməsinə dair hərtərəfli saziş imzalamaq barədə razılığa gəliblər. Zelenskinin ofisinin rəhbəri Andrey Yermak danışıqlardan sonra ABŞ-nin əlverişli hesab etdiyi zaman faydalı qazıntı sazişinin imzalanacağını deyib.

Peskov daha əvvəl demişdi ki, Tramp və Putin Amerika liderinin 2025-ci il yanvarın 20-də andiçmə mərasimindən sonra fevralın 12-də yalnız bir telefon danışığı aparıblar. Onlar Ukraynada döyüşlərin dayandırılması, ikitərəfli münasibətlər və bəzi digər mövzuları müzakirə ediblər, həmçinin təmasları davam etdirmək və təkbətək görüş təşkil etmək barədə razılığa gəliblər.

Firuzə Əliyeva

"Tramp və Putin tezliklə danışacaq" - Kreml məlumat YAYDI