Türkiyə-Yunanıstan arasında gərginlik - Yeni mərhələ başlayır?

Türkiyənin Avropa müdafiəsində mühüm rol alması Afinada ciddi narahatlıqlara səbəb olub. Belə ki, Avropa ölkələri Ankaranı əvəzolunmaz tərəfdaş hesab edir və Türkiyənin “Eurofighter” təyyarələri, Meteor raketləri ilə güclənəcəyi gözlənilir. Türkiyə həm strateji güc kimi önə çıxır, həm də Avropa üçün potensial təhlükə kimi qiymətləndirilir.

Maraqlıdır, illərdir davam edən Türkiyə-Yunanıstan gərginliyi fonunda yeni mərhələ başlaya bilərmi?

Mövzu ilə bağlı Sfera.az-a açıqlama verən politoloq Elxan Şahinoğlu bildirib ki, Yunanıstan əhali sayı və ərazi böyüklüyünə görə hər zaman Türkiyəyə paxıllıq hissi ilə yanaşıb. Onun sözlərinə görə, Yunanıstan əhali sayı özündən 9 dəfə çox olan Türkiyə ilə başabaş siyasət yürütməyə çalışır:

“Bəzən bu xüsusən də dənizlərdə təhlükələr yaradır. Zaman-zaman danışıqlar sayəsində gərginliyin azalması tendesiyası baş verir. Buna baxmayaraq, Yunanıstan höküməti, dəyişən baş nazirlər hər zaman Türkiyə əleyhinə Avropada siyasət yürütməyə çalışıb. İndi də bölgədə Türkiyənin artan gücündən narahatdırlar. ABŞ təhlükəsizlik çəmbərini Avropanın üzərindən çəkəndən sonra Türkiyənin Avropada rolu arta bilər. Bu da Yunanıstanı narahat edə bilər”.

E.Şahinoğlu qeyd edib ki, başqa dövlətlərin Türkiyə texnologiyasına ehtiyacı var:

“İtaliya belə, Türkiyədən dronlar almaqla bağlı saziş imzalayıb. Türkiyəni Avropa İttifaqına qəbul etməsələr də, bölgədə yeri və rolu bəllidir. Rusiya-Ukrayna müharibəsində də Türkiyə əsas vasitəçilərdən biridir. Təsadüfi deyil ki, ukrayna Prezidenti Volodimir Zelenski də deyib ki, Ukraynanın təhlükəsizliyinə təminat verən ölkələr arasında mütləq Türkiyə də olmalıdır. Rusiya da Türkiyənin təşəbbüsləri ilə razılaşır”.

Politoloq sonda vurğulayıb ki, Yunanıstan əlində olan resurslarla bu proseslərə mane ola biləcək güc və potensialda deyil.

Firuzə Əliyeva