İrana bağlı qüvvələr məhv edilir: 3 kənd geri alındı

Suriya ordusu hücum edərək, 3 kəndi Bəşər Əsəd qüvvələrindən geri alıb.

Axar.az xəbər verir ki, bu barədə yerli media məlumat yayıb.

Suriya İnsan Haqlarını Müşahidə Qrupunun iddiasına görə, son toqquşmalarda Suriya qüvvələrinin 37 əsgəri həlak olub. Həmçinin “Əsədə sadiq qüvvələr” adı ilə təqdim edilən ələvi üsyançıları arasından 34 yaraqlı öldürülüb.

Məlumata görə, şiddətli döyüşlər zamanı yeni hökumətə sadiq qüvvələr sahilə yaxın yerləşən Şir, Muxtariyyə və Haffa kəndlərinə nəzarəti ələ keçirib.

Ümumilikdə toqquşmalar başlayandan bəri ölənlərin sayının təxminən 150 nəfər civarında olduğu (mülki şəxslər də daxil) bildirilir.

Qeyd edək ki, ötən gün ələvilərin Suriya Dövlət Təhlükəsizlik İdarəsi əməkdaşlarına hücumu ilə toqquşmalar başlayıb. Bunun ardınca Dəməşq bölgərə ordu qüvvələri göndərib.

Əsədə bağlı olan ələvi qüvvələrin arxasında İranın dayandığı haqda məlumatlar var.