Türkiyə Avropaya PUA satacaq - Razılaşma əldə edildi

Türkiyənin “Baykar” şirkəti və İtalyanın dövlət nəzarətində olan müdafiə sənayesi nəhəngi “Leonardo”, ortaq pilotsuz uçuş aparatı (PUA) istehsalı üçün anlaşma memorandumu imzalayıb. 

Sfera.az "Sözcü" qəzetinə istinadən xəbər verir ki, razılaşmaya əsasən, Avropada artan PUA ehtiyacını qarşılamaq və müdafiə bazarından pay almaq məqsədilə İtaliya və Türkiyədə istehsal müəssisələri yaradacaq. 

“Leonardo”nun baş direktoru Roberto Çinqlani keçirdiyi mətbuat konfransında bildirib ki, Avropada pilotsuz texnologiyalar sahəsində boşluq mövcuddur və qlobal təhlükəsizliyin təmin edilməsi bu dövrdə xüsusi əhəmiyyət daşıyır. O, “Baykar” ilə əməkdaşlığın bu problemi həll etməyə kömək edəcəyini vurğulayıb. Beş ay davam edən danışıqlar nəticəsində əldə olunan razılaşmaya əsasən, tərəflər artıq öz ölkələrinin silahlı qüvvələri ilə ilkin müzakirələrə başlayıb. Çinqlani bildirib ki, “Baykar” və “Leonardo” son 4-5 il ərzində kommersiya səviyyəsində əməkdaşlıq edib və bu tərəfdaşlıq daha da genişləndiriləcək. Şirkətlərin proqnozlarına görə, Avropada PUA bazarının həcmi növbəti on ildə 100 milyard dollara çatacaq. 

Bəsti Rəfizadə