İsrail yenidən əməliyyatlara başlaya bilər - “Tramp xəbərdarlığında ciddidir”
ABŞ Prezidenti Donald Tramp HƏMAS-ı bütün girovları dərhal azad etməyə çağırıb. O, əks halda ciddi nəticələrin olacağını bildirib. “Ağıllı qərar qəbul edin – onları indi azad edin, yoxsa bunun əvəzini ödəməli olacaqsınız”, – deyə Tramp HƏMAS-ı hədələyib.
Trampın bu açıqlamalarında məqsədi nədir? ABŞ HƏMAS-a qarşı yeni əməliyyata əsas yartmaq istəyir?
Sfera.az saytına açıqlama verən politoloq Oqtay Qasımov hesab edir ki, Trampın bu çağırışı əvvəlki xəbərdarlıqlarının davamıdır və ABŞ-nin İsrailə hərbi dəstəyini artıracağı ehtimalını gücləndirir.
“Donald Tramp hazırda güc yolu ilə təzyiq göstərmək və nəticə almaq siyasəti yürüdür. ABŞ-nin İsrailə verdiyi hərbi dəstək bunun əsas göstəricisidir”, - söyləyən ekspert bildirdi ki, Tramp daha əvvəl də HƏMAS-a müraciət edərək girovların qeyd-şərtsiz azad olunmasını tələb edib və əks halda bunun ağır nəticələri olacağını bəyan edib:
“İndi də eyni ritorikanı davam etdirir və bu çağırış daha konkret təhlükələr ehtiva edir. Əgər HƏMAS girovları azad etməsə, İsrailin genişmiqyaslı hərbi əməliyyatlara başlaması ehtimalı ciddi şəkildə artır. ABŞ İsrailə ən müasir silahların tədarükünü davam etdirir və bu silahlar arasında yeraltı bunkerləri və tunelləri məhv edə bilən raketlər də var. Donald Tramp və İsrailin Baş naziri Benyamin Netanyahunun son görüşündə bu silahların İsrailə verilməsi məsələsi razılaşdırılıb. Bu isə o deməkdir ki, İsrail HƏMAS-ın gizli tunel şəbəkələrinə qarşı daha sərt və effektiv hücumlar təşkil edə bilər".
Bəs HƏMAS Trampın çağırışına necə cavab verəcək?
Politoloq hesab edir ki, HƏMAS Trampın bu mesajını ciddi şəkildə nəzərə almalıdır. Onun fikrincə, təşkilat girovların azad edilməsinə razılıq verməsə, ABŞ və İsrailin daha sərt addımlar atacağı qaçılmazdır:
“Hazırkı vəziyyət göstərir ki, İsrail və ABŞ HƏMAS-a qarşı maksimum təzyiq siyasətini davam etdirəcək. Girov məsələsinin uzanması Trampın daha sərt qərarlar qəbul etməsi ilə nəticələnə bilər. Bu qərarlar ya İsrailin hərbi əməliyyatlarının intensivləşdirilməsi, ya da HƏMAS-ın əsas liderlərinə qarşı birbaşa hücumların artması istiqamətində ola bilər. HƏMAS bu riskləri nəzərə alaraq müəyyən güzəştlərə getməyə məcbur ola bilər və bu prosesin nəticəsi olaraq girovların azad edilməsi baş tuta bilər”.
Ekspertin sözlərinə görə, HƏMAS üçün alternativ variant beynəlxalq vasitəçilər, xüsusilə Misir və Qətərin iştirakı ilə girov məsələsini həll etməyə çalışmaq olacaq. Lakin İsrailin və ABŞ-nin tələbləri nəzərə alınarsa, bu prosesin uzanması HƏMAS üçün daha ciddi təhlükələr yaradacaq.
Bəsti Rəfizadə
