Zelenski üzr istəməyəcək - "Pis bir şey etməmişəm"

Volodimir Zelenski Oval kabinetdə ABŞ Prezidenti Donald Trampla sərt danışığına görə üzr istəməkdən imtina edib. 

Sfera.az xəbər verir ki, Zelenski bunu “Fox News”a müsahibəsində deyib. "Mən prezidentə hörmət edirəm, Amerika xalqına hörmət edirəm. Düşünürəm ki, biz çox açıq və çox dürüst olmalıyıq. Və pis bir şey etdiyimizə əmin deyiləm”,- deyə Ukrayna lideri bildirib. 

Zelenski ABŞ lideri ilə münasibətləri xilas etməyin mümkün olduğunu da nəzərə çatdırıb. "Bu, iki prezidentin münasibətindən daha artıqdır. Bu, tarixi, xalqlarımız arasında möhkəm əlaqələrdir", - o, müvafiq sualı cavablandırarkən deyib. 

Qeyd edək ki, cümə günü səhər Zelenski Ağ Evdə Trampla görüşüb. Onların danışığı anidən mübahisəyə çevrilib. Tramp Zelenskini ABŞ-yə hörmətsizlik etməklə ittiham edib və vitse-prezident Vance Zelenskinin Kiyevə göstərilən bütün dəstəyə görə heç vaxt ölkəyə təşəkkür etmədiyini söyləyib. İclasdan sonra keçirilməsi planlaşdırılan mətbuat konfransı ləğv edilib və Ukrayna nümayəndə heyəti Ağ Evi planlaşdırıldığından tez tərk edib. İkitərəfli danışıqlar və Ukraynanın mineral ehtiyatlarına dair müqavilənin imzalanması təxirə salınıb.

Firuzə Əliyeva