Dünən Ağ Evdə Donald Tramp və Volodimir Zelenski arasında keçirilən görüş iki lider arasında mübahisə ilə nəticələnib. Tramp Zelenskini “ya sövdələşməyə gedəcəksiniz, ya da biz yoxuq” sözləri ilə hədələyib. Zelenski isə bu tələbə etirazını bildirib.

Görüşdən sonra Tramp bəyanatında Zelenskini hörmətsizlik etməklə ittiham edib. Ukrayna lideri həmin görüşdən sonra Vaşinqton səfərini yarımçıq dayandırmaq qərarı alıb.

Maraqlıdır, bundan sonra proses necə irəliləyəcək?

Sfera.az-a açıqlamasında politoloq Elxan Şahinoğlu bildirib ki, Rusiya Prezidenti Vladimir Putin Ağ Evdə Trampla-Zelenski qovğasından öz məqsədləri üçün istifadə etməyə çalışacaq. Onun sözlərinə görə, öncə Rusiya ordusu cəbhə bölgəsində irəliləməyə çalışacaq, sonra isə Putin Trampla yaxın müddətdə görüşməyə cəhd edəcək.

E.Şahinoğlu qeyd edib ki, Putin Zelenskinin vəziyyətinə düşməmək üçün görüşün üçüncü ölkədə və qapalı keçirilməsini tələb edəcək. O, həmçinin, vurğulayıb ki, Ukrayna ABŞ-nin maliyyə və hərbi yardımını unutmalıdır: "Ukrayna ancaq öz gücünə arxalanmalıdır. Bəlkə də resurslarla barədə bu gün Ağ Evdə sazişin imzalanmaması Ukraynanın xeyrinə oldu. Tramp həmin sazişlə Ukraynanın rerurslarını ələ keçirmək istəyirdi. Buna baxmayaraq, Zelenski ABŞ-nin borcuyla bağlı nəsə etməlidir. Əlbəttə, bu, Trampın iddia etdiyi kimi 350 milyard dollar deyil. Hər halda, borcun 100 milyard dollar civarında olduğu bildirilir. Kiyev bu borcu müharibədən sonra hissə-hissə qaytarmalı olacaq. Kiyev indidən bunun mexanimzini düşünməlidir".

Politoloqun fikrincə, Avropa da Ağ Evdəki qovğadan dərs çıxarmağa çalışacaq: "Hamıya aydın oldu ki, Trampın Ağ Evdə olduğu müddətdə Avropa ilə ABŞ arasında məsafə daha da uzanacaq, NATO-nun birliyi zəifləyəcək. Avropa ölkələri təhlükəsizliyə xərclərini artırmalı olacaqlar. Avropa ölkələrinin büdcələrini daha çox sosial problemlərin həllinə yönətlmək, təhlükəsizlik məsələlərini isə Amerikaya yükləmək dövrü bitdi".

E.Şahinoğlu onu da vurğulayıb ki, Ağ Evdəki qovğanı gördükdən sonra Azərbaycanın da Tramp administrasiyasından uzaq olması faydalıdır.

Firuzə Əliyeva

Ukrayna üçün çətin dövr başlayır: “ABŞ-nin dəstəyi zəifləyəcək”