Biri boğulub, digəri köpək balıqları tərəfindən parçalanıb: İki rus turist öldü
Filippində iki rusiyalı turist suya düşərkən ölüb. Biri boğularaq ölüb, digəri isə köpək balıqlarının hücumuna məruz qalıb. Filippin Sahil Mühafizəsinin sözçüsü hadisənin Verde adasında baş verdiyini bildirib.
Sfera.az bildirir ki, turistləri suya dalarkən güclü sualtı cərəyan aparıb, daha iki nəfər sağ qala bilib.
Filippin Sahil Mühafizəsi Komandiri kapitan Airland Lapitan bildirib ki, fevralın 27-də Şərqi Mindoro əyalətinin yaxınlıqdakı Puerto Qalera şəhərindən Verde adasının sularına dalmaq üçün dörd rusiyalı və bir dalğıc təlimatçısından ibarət qrup yola düşüb.
Dalış zamanı onların hamısını güclü sualtı cərəyan aparıb.
İki rusiyalı (57 yaşlı Eduard Perequdin və 18 yaşlı Timofey Perequdin) dalğıc təlimatçısı ilə birlikdə su səthinə çıxa bilib, lakin sonradan 29 yaşlı İlya Perequdin və 39 yaşlı Maksim Melexov kimi tanınan digər iki nəfər itkin düşüb. Lapitan bildirib ki, Filippin Sahil Mühafizəsinin üzvləri ilə birlikdə ərazidə dalğıc təlimatçısı və digər dalğıclar dərhal axtarışa başlayıblar.
Onun sözlərinə görə, bir saat sonra Melexov dənizdə huşsuz vəziyyətdə tapılıb və Batanqas xəstəxanasında həkimlər onun öldüyünü elan ediblər.
Məlumata görə, Perequdini köpək balıqları parçalayıb, qolu isə bədənindən ayrılmış vəziyyətdə tapılıb. Bildirilib ki, xilasedicilər dənizdə köpək balığı ilə dolu olduğundan qurbanın cəsədini çıxarmaqda çətinlik çəkiblər.
Onu da qeyd edək ki, Filippin ətrafındakı sularda köpəkbalığı hücumları olduqca nadirdir, 2024-cü ildə sahil sularında heç bir köpəkbalığı hücumu qeydə alınmayıb.
Aysel
