Ukrayna müharibəsi sona çatır? - “ABŞ razıdır, Rusiya isə atəşkəsə getməlidir”

Türkiyənin xarici işlər naziri Hakan Fidan Rusiya-Ukrayna müharibəsinin yaxın vaxtlarda sona çatacağına ümid etdiklərini bildirib. Nazir Türkiyənin yaxın aylarda bu istiqamətdə real addımlar atılmasını gözlədiyini vurğulayaraq əlavə edib ki, yaydan əvvəl münüqişənin həlli istiqamətində konkret addımlar olacaq. 

Münaqişənin tezliklə nizamlanması ehtimalı nə dərəcədə realdır? Önümüzdəki aylarda Türkiyənin təşəbbüsü ilə hansı diplomatik proseslər baş verə bilər? 

Bununla bağlı fikirlərini Sfera.az-la bölüşən siyasi ekspert Məhəmməd Əsədullazadə bildirdi ki, Rusiya-Ukrayna müharibəsi yeni mərhələyə keçib.

Ekspert qeyd etdi ki, sülhün əldə edilməsi istiqamətində danışıqlar aparılır: “Ukrayna razıdır, artıq ABŞ ilə ortaq məxrəcə gəlinib, sadəcə Rusiya atəşkəsə getməlidir. Türkiyə bu istiqamətdə Rusiya ilə müəyyən danışıqlar aparır. Fevralın 27-də də İstanbulda Rusiya və ABŞ nümayəndələri arasında görüş keçiriləcək. Gedişat müsbət görünür. Tərəflər arasında atəşkəsə getmək mümkün ola bilər. Türkiyə də əlindən gələni edir ki, razılaşma əldə olunsun. İlkin razılaşma atəşkəslə bağlı ola bilər, amma əsas məsələ Rusiyanın tutduğu ərazilərdən çıxmasından ibarətdir ki, bu da çətin məsələdir”.

M.Əsədullazadənin fikrincə, Rusiya mövqeyində israr etsə, Böyük Britaniya, Fransa və Almaniya qoşunlarını Ukraynaya göndərəcək ki, bu da yeni bir müharibənin alovlanmasına səbəb ola bilər. 

Firuzə Əliyeva