Konqonun şimal-qərbində naməlum xəstəlik bir çox insanın həyatına son qoyub. Hadisə yerində olan həkimlərin və Ümumdünya Səhiyyə Təşkilatının məlumatına görə, simptomların başlaması ilə ölüm arasındakı interval əksər hallarda 48 saat olub.

Sfera.az bildirir ki, müəmmalı xəstəlik artıq 53 nəfərin ölümünə səbəb olub, yanvar ayından bu yana 419 yoluxma halı qeydə alınıb.

Konqodakı Bikoro Xəstəxanasının baş həkimi Serj Nqalebato jurnalistlərə "Bizi həqiqətən narahat edən bu sürətdir"- deyə bildirib.

Qeyd edək ki, Konqo Demokratik Respublikasında sonuncu epidemiya yanvarın 21-də başlayıb, 53 ölüm də daxil olmaqla 419 hadisə ilə bağlı məlumat verilib.

ÜST-nin Afrika ofisinin məlumatına görə, Boloko şəhərində ilk epidemiya üç uşaq yarasa yedikdən və hemorragik qızdırma simptomları səbəbindən 48 saat ərzində öldükdən sonra başlayıb.

Həkimlər vəhşi heyvanlardan insanlara keçən xəstəliklərdən, xüsusən də bunun tez-tez baş verdiyi ərazilərdən narahatdırlar. ÜST 2022-ci ildə bildirib ki, Afrikada bu cür naməlum xəstəliklərin yayılması son on ildə 60%-dən çox artıb.

Təşkilat bildirib ki, fevralın 9-da Bomate şəhərində hazırkı sirli xəstəliyin ikinci epidemiyası başladıqdan sonra 13 hadisədən nümunələr sınaq üçün Konqonun paytaxtı Kinşasadakı Milli Biotibbi Araşdırmalar İnstitutuna göndərilib.

Bütün nümunələr Ebola və ya digər ümumi hemorragik qızdırma üçün mənfi olsa da, bəziləri malyariya üçün müsbət nəticə verib.

Qeyd edək ki, ötən il Konqonun başqa bir hissəsində onlarla insanın ölümünə səbəb olan başqa bir sirli qripə bənzər xəstəliyin malyariya olduğu aşkar edilib.

Yeri gəlmişkən, onu da qeyd edək ki, Konqoda qoşunlarla Ruanda tərəfindən dəstəklənən M23 üsyançıları arasında şiddətli döyüşlər davam edir. Uşaqlar da daxil olmaqla 7000-dən çox insan həlak olub. Təxminən 600 nəfər, o cümlədən 170 uşaq zorlanıb.

Aynil

Naməlum xəstəlik 48 saatda öldürür