Zelenski: Müharibəni bu il bitirə biləcəyimizə ümid edirəm

Ukrayna Prezidenti Volodimir Zelenski müharibənin bu il sona çatacağına ümid etdiyini bildirib.

Sfera.az xəbər verir ki, o, Kiyevdə keçirilən “Ukraynaya Dəstək” sammitindən sonra açıqlama verib.
 

“Bu müharibənin üç il davam etməsinə imkan vermədən, məhz bu il bitirə biləcəyimizə ümid edirəm. Mövcud vəziyyət xalqımız üçün son dərəcə çətindir”, – deyə Zelenski qeyd edib.
 

O, həmçinin ədalətli və dayanıqlı sülhün vacibliyini vurğulayaraq, müharibənin başlanmasına səbəb olan amillərin unudulmamalı olduğunu bildirib. Zelenski, müharibəni başladanların ədalət qarşısında cavab verəcəyini də əlavə edib.
 

Ukrayna lideri çıxışı zamanı Avropa İttifaqı və NATO-ya üzvlüyün ölkənin gələcək təhlükəsizliyinə böyük töhfə verəcəyini bildirib. O qeyd edib ki, güclü ordu və möhkəm müttəfiqlərə sahib olmaq, Rusiyanın yenidən hücuma keçməsinin qarşısını ala bilər.
 

Sammitdə Avropa İttifaqı liderləri ilə yanaşı, Şimali Avropadan və Kanadadan yüksək səviyyəli nümayəndələr də iştirak edib. Toplantıda Ukraynaya dəstəyin davam etdirilməsi və müharibənin bitirilməsi üçün atılacaq addımlar müzakirə olunub.

Altay
Sfera.az