Rusiya-Ukrayna müharibəsində gizli danışıqlar - Bu ölkədə toplaşırlar...

ABŞ və Rusiya rəsmiləri Ukraynadakı münaqişəni müzakirə etmək üçün son aylar İsveçrədə bir neçə gizli danışıq aparıblar. Maraqlı fakt ondan ibarətdir ki, bu görüşlər ABŞ-nin öncəki Prezidenti Co Baydenin dövründən başlayıb. 

Sfera.az xəbər verir ki, bu haqda məlumatı “Reuters” Agentliyi üç mənbəyə istinadən yayıb. Mənbələr danışıqlarda iştirak edənlərin adlarını açıqlamaqdan imtina ediblər. Sadəcə qeyd ediblər ki, danışıqları aparanlar dövlət qulluqçuları deyil, diplomatiya və təhlükəsizlik sahəsində təcrübəsi olan şəxslər olub. 

Donald Trampın bəzi müşavirlərinə görüşlər barədə məlumat verilib. O da məlum olub ki, keçən həftə Münhen Təhlükəsizlik Konfransına paralel olaraq Cenevrədə belə görüşlərdən ən azı biri keçirilib. Keçirilən görüşlər konkret təkliflər olmadan fikir mübadiləsi formasında aparılıb.

Xatırladaq ki, fevralın 18-də Ər-Riyadda ABŞ və Rusiya nümayəndə heyətləri arasında danışıqlar baş tutub. Əldə edilən əsas razılaşmalar arasında Rusiya-Ukrayna münaqişəsinin həlli üçün danışıqlar qrupunun yaradılması, Moskva və Vaşinqtondakı səfirliklərin əməkdaşlarının bərpası, həmçinin prezidentlər Vladimir Putin və Donald Tramp arasında görüş üzərində iş yer alıb.

Vasif