Böyük Britaniya qoşun göndərir - Rusiya-Ukrayna müharibəsi sonlanır?

Böyük Britaniyanın Baş naziri Kir Starmer Ukraynaya təhlükəsizlik təminatı vermək məqsədilə qoşun göndərməyə hazır olduqlarını açıqlayıb. Baş nazir deyib ki, Ukraynanın təhlükəsizliyinin təminatında oynayacaqları istənilən rol həm ölkələrinin, həm də qitənin təhlükəsizliyini təminat altına almağa kömək edəcək. 

Starmer ABŞ-nin təhlükəsizlik təminatının da möhkəm sülh üçün vacib olduğunu və bu səbəbdən mövzunu Donald Trampla müzakirə edəcəyini söyləyib. 

Sfera.az xəbər verir ki, Avropa liderlərinin bu gün keçiriləcək fövqəladə zirvə toplantısında bu məsələlər müzakirəyə çıxarılacaq. Ukraynaya göndəriləcək hərbi kontingentin tərkibində Fransa hərbçiləri də xüsusi yer tutacaq. 

Böyük Britaniya baş nazirinin açıqlamasını şərh edən politoloq Şahin Cəfərli bunun tarixi əhəmiyyətli qərar olacağını bildirib. Politoloq dedi ki, hazırda gündəmi daha çox ABŞ-Avropa münasibətləri, ABŞ-Rusiya dialoquna Ukrayna və Avropanın cəlb edilib-edilməyəcəyi ilə bağlı mövzular zəbt edib.

Bu vəziyyətin Rusiya üçün əlverişli olduğunu söyləyən Ş.Cəfərli tezliklə bütün diqqətlərin yenidən Rusiyaya yönələcəyini və bunun ciddi Rusiya üçün əlverişli olmayan ağır nəticələr verəcəyini qeyd edib:

“Rusiya bu müharibənin sonunda ingilislər başda olmaqla, Qərb qoşunlarının Ukrayna sərhədlərinə yerləşdirilməsi ssenarisini heç düşünməmişdi. Müharibənin bu cür sonluqla bitməsi Putinin elan etdiyi vəzifələrə və məqsədlərə tamamilə zidd olan yeni reallıqlar ortaya çıxaracaq. Çünki 18-19% ərazisini itirmiş olsa da, müstəqil, milli Ukrayna dövləti mövcudiyyətini davam etdirəcək və bu mövcudluğa Qərb təminat verəcək. Bu, Rusiyanın bir daha Ukraynanı təhdid edə bilməyəcəyi və onu birdəfəlik itirəcəyi anlamına gəlir. Halbuki Rusiyanın bu müharibəni başlatmaqda fundamental məqsədi Ukraynanı təkrar Moskvanın asılılığına qaytarmaqdan ibarət idi”. 

Vasif