ABŞ-nin Nyu-York şəhərində meriya qarşısına toplaşan minlərlə etirazçı Tramp administrasiyasının mühacirlərə qarşı sərt siyasəti və fələstinlilərin Qəzzadan zorla çıxarılması təklifinə qarşı genişmiqyaslı nümayiş keçirib.

Sfera.az bildirir ki, aksiyalar sosial şəbəkələrdə “50 etiraz, 50 ştat, bir gün” həştəqləri ilə elan edilib. Bu, Filadelfiya, Miçiqan, Texas və Viskonsin də daxil olmaqla, ölkənin bir çox şəhərlərində rezonans doğurub. Etirazçılar təkcə Tramp administrasiyasını deyil, həm də milyarder İlon Maskı və Respublikaçıların “Layihə 2025” gündəmini hədəf alıblar. Onlar Trampın nüfuzlu məsləhətçilərindən biri kimi görünən İlon Maskın administrasiyada artan roluna etiraz ediblər. “İlon Mask deportasiya edilməlidir”, “İlon Mask getməlidir” və “İlon Mask, çıx get” kimi şüarlar səsləndirənlər iş adamının yeni yaradılmış Hökumətin Səmərəliliyi Departamentindəki fəaliyyətini pisləyiblər. Nümayişçilər Trampın immiqrasiya siyasətinə qarşı həmrəylik mesajı vermək üçün Amerika, Meksika və Kanada bayraqları da qaldırıblar.

Nyu York Polis Departamentinin (NYPD) ciddi təhlükəsizlik tədbirləri altında keçirdiyi etiraz aksiyasında insident yaşanmayıb. Etirazların ölkə daxilində daha çox dəstək qazanacağı və yaxın günlərdə yeni nümayişlərin keçiriləcəyi gözlənilir.

Günay Rəsulqızı

ABŞ-də etiraz aksiyaları BAŞLADI: “İlon Mask, çıx get” - FOTO