"Zelenski dəlidir, ümid edirəm ki, Avropa liderləri..." - Peskov

“Qərb Kiyevi NATO-ya qəbul etmirsə, Ukraynaya nüvə silahı verməli və öz kontingentini bu ölkəyə göndərməlidir”.

Bunu Ukrayna Prezidenti Volodimir Zelenski britaniyalı jurnalist Pirs Morqana müsahibəsində deyib. Ukrayna lideri qeyd edib ki, Kiyev NATO-ya üzv qəbul olunmasa, yenidən nüvə dövləti olmağa hazırdır.

Sfera.az bildirir ki, Rusiya prezidentinin mətbuat katibi Dmitri Peskov sözügedən açıqlamaya reaksiya verib. O, Zelenskinin nüvə silahı ilə bağlı fikirlərinə kəskin reaksiya bildirib və qarşı tərəfi “dəli” adlandırıb. Peskov vurğulayıb ki, bu cür bəyanatlar hazırkı danışıqlar prosesinə sabotaj yarada bilər.

“Belə bəyanatlar və şərhlər dəliliyə bərabərdir. Ümid edirəm, Avropa siyasətçiləri hələ də belə bir mövzunun müzakirəsinin absurdluğu və təhlükəsi barədə anlayışlarını saxlayırlar”, - Kremlin sözçüsü qeyd edib.

Peskov nüvə silahının yayılmaması ilə bağlı mövcud razılaşmalara əməl etməyin vacibliyini vurğulayıb.

Türkan