8 günlük missiya üçün kosmosa getdi, 8 Aydır geri qayıda bilmir

NASA astronavtları Suni Williams və Barry Wilmore kosmosa cəmi 8 gün davam edəcək bir missiya üçün gediblər. Ancaq 8 ay keçib və onlar hələ də Yerə qayıda bilmirlər.

Bəs kosmosdakı bu uzun müddət onların bədənlərinə necə təsir edir?
 

Sfera.az bildirir ki, NASA astronavtları Barry Wilmore və Sunita Williams iyunun 5-də Beynəlxalq Kosmik Stansiyaya səkkiz günlük missiyaya göndəriliblər. Lakin onları daşıyan kosmik gəmidə aşkar edilən texniki nasazlıqlar səbəbindən geri qayıtmaları gecikib.
 

Əvvəlcə cəmi bir ay daha qalması planlaşdırılan astronavtların indi təxminən səkkiz aya yaxındır ki, kosmosda qalıblar və ən tez mart ayında geri dönəcəkləri gözlənilir. Bu, Williamsın öz sözləri ilə desək, "bir az şok" kimi gəlir.


Suni Williams keçmiş orta məktəbinin tələbələri ilə müsahibədə bu qədər uzun müddət kosmosda olmağın gözlənilməz təsirlərini təsvir edib:
 

"Mən necə yeriməyi xatırlamağa çalışıram" - deyən Williams kosmosda hərəkət etmək, üzmək və ya uçmaq kimi bir şey olduğunu soruşduqda cavab verib.

"Mən uzun müddətdir buradayam və yeriməyi xatırlamaq çətinləşir. Gəzmək, oturmaq, uzanmaq yoxdur, heç buna ehtiyac da yoxdur. Sadəcə gözlərini yumub yerində süzülürsən."

Belə uzun müddət çəkisiz bir mühitdə qalmaq əzələ və sümük quruluşunun zəifləməsinə səbəb ola bilər. Bundan əlavə, cazibə qüvvəsi olmayan bir mühitdə tarazlıq və koordinasiya qabiliyyətləri də zamanla pisləşə bilər.


Fiziki çətinliklərlə yanaşı, kosmosda belə uzun müddət qalmaq astronavtların psixologiyasına da təsir edir. Williams ailəsindən uzaq olmağın xüsusilə çətin olduğunu deyir.


“Anam qocalır, ona görə də bacardığım qədər onlarla əlaqə saxlamağa çalışıram. Demək olar ki, hər gün anama zəng edib, halını soruşuram”.

Tez-tez ünsiyyət qursalar da, bu qədər uzun müddət kosmosda olmanın gətirdiyi tənhalıq və Yerdən uzaq olmaq hissi missiyanın planlaşdırılmamış problemi olaraq ortaya çıxır.
 

Bəs onlar nə vaxt qayıdacaqlar? Astronavtların ən tez Mart ayında Yerə qayıtması gözlənilir. Ancaq müddət daha uzun ola bilər.

Xanım