İsveç Ukraynaya rekord məbləğdə hərbi yardım paketi AYIRACAQ

İsveç Ukraynaya 1,2 milyard dollar dəyərində ən böyük hərbi yardım paketini təqdim edəcək. 

Sfera.az xəbər verir ki, bu barədə ölkənin müdafiə naziri Pol Conson  “X” sosial şəbəkəsində məlumat verib.

Nazirin sözlərinə görə, bu məbləğin təxminən 90 milyon dolları Ukraynanın uzaqmənzilli raketləri və pilotsuz təyyarələrinin istehsalına yönəldiləcək. Bütün paketin dörddə biri İsveçin öz hərbi ehtiyatlarından təhvil verəcəyi silahlardan ibarət olacaq. Bunlara 16 döyüş kateri (əvvəllər təhvil verilmiş 16 gəmidən əlavə), 1500 tank əleyhinə raket və 200 AT4 qumbaraatanları daxildir.

Ukraynanın ehtiyacları üçün İsveç və digər Avropa ölkələrində yeni silahların istehsalına 534 milyon dollar ayrılacaq ki, bu da ümumi məbləğin 45%-ni təşkil edir. Daha 250 milyon dollar müxtəlif beynəlxalq fondlara yönəldiləcək. O cümlədən, 178 milyon dollar Ukraynanın hərbi sənaye kompleksini dəstəkləmək üçün vəsaitin cəlb edilməsini nəzərdə tutan qondarma “Danimarka modeli” üçün ayrılacaq.

İsveç hökumətinin saytında aydınlıq gətirilir ki, bu, artıq Ukraynaya verilən 18-ci hərbi yardım paketidir. Rusiyanın genişmiqyaslı işğalı başlayandan bəri İsveçdən hərbi dəstəyin ümumi məbləği 61,9 milyard İsveç kronuna (təxminən 5,4 milyard avro) çatıb.

Firuzə Əliyeva