Xəbər verdiyimiz kimi, dünən Trampın andiçmə mərasimi baş tutub. O, ABŞ-nin 47-ci prezidenti kimi and içib. İnauqurasiyada diqqət çəkən məqamlardan biri də iştirakçılar arasında Mark Zukerberq (Meta ), Ceff Bezos (Amazon), Sundar Pichai (Google), Tim Kuk (Apple), İlon Mask (Tesla və SpaceX ), Sam Altman (OpenAI ), Shou Zi Chew (TikTok) kimi dünyanın texnologiya liderlərinin olması idi.

Maraqlıdır, Tramp nə üçün bu şəxsləri ətrafına toplayıb?

Mövzu ilə bağlı Sfera.az-a açıqlama verən Azərbaycan İnternet Forumunun prezidenti Osman Gündüz bildirib ki, görünən odur ki, ABŞ-nin siyasi establişmenti və dünyanın texnoloji elitası birləşib.

Gündüzün sözlərinə görə, onların bir çoxu Trampın əvvəlki prezidentlik dönəmində, hətta 2023-cü ilədək onunla düşmən münasibətdə olublar:

“Onun sosial hesablarını bağlayıblar, statuslarını və mesajlarını siliblər, hər vasitə ilə onu əngəlləyiblər. Tramp isə onları “xalq düşməni”, “saxta xəbər mənbələri” adlandırıb. Ötən dövrlərdə az qalmışdı ki, Tramp bu şirkətlərin hər birini bir neçə yerə bölsün. İndi isə görünür ki, hamısı bir yerdədirlər”.

O.Gündüz qeyd edib ki, burada bir neçə məqam ola bilər:

“Tramp texnoloji liderləri andiçməyə dəvət etməklə keçmiş mübahisələri aradan qaldırmaq və gələcəyə yönəlmiş yeni əməkdaşlıq səhifəsi açmaq istəyir. O, texnologiya nəhənglərinin dəstəyi ilə ABŞ-nin dünyada texnologiyalar və innovasiyalar, həmçinin süni intellekt sahəsində liderliyini möhkəmləndirməyi hədəfləyib. Eyni zamanda, texnologiya liderlərinin Trampı ziyarət etməsində həm də bu liderlərin rəhbərlik etdikləri şirkətlərin gələcək taleyinin sual altında olması da mühüm rol oynayıb. Keçmiş dövrlərdə Tramp administrasiyası texnoloji nəhənglərə qarşı antiinhisar qanunları sərtləşdirmək niyyətində olub və dəfələrlə sosial media platformalarının ifadə azadlığını məhdudlaşdırdığı bildirib. Tramp əvvəllər bir çox texnoloji şirkətlərin hədsiz böyük səlahiyyətlər əldə etməsindən narahatlığını ifadə etmişdi. Güman ki, indi bu liderlər Trampın yeni administrasiyası ilə yaxşı münasibət quraraq, gələcəkdə bu tənzimləmələrin qarşısını almaq, gələcək riskləri idarə etmək və ya daha yumşaq siyasətlərə nail olmaq niyyətindədir”.

AİF prezidenti vurğulayıb ki, dünənə kimi aralarında soyuq münasibətlər olmasına baxmayaraq, yenidən bir yerdə toparlanmaq həm də təbii ki, maddiyyat, bizneslə bağlıdır:

“Bu qlobal texnologiya nəhəngləri, texnologiyalar və süni intellekt, enerji, kosmos və kibertəhlükəsizlik kimi strateji sahələrdə ABŞ hökumətindən əhəmiyyətli maliyyə yardımları və subsidiyalar alırlar. Ötən dövrlərdə təkcə Cef Bezosun bulud texnologiyaları ilə bağlı ABŞ hökuməti ilə 10 milyardlıq bir müqaviləsini Tramp əngəlləmişdi. Səbəb isə Bezosun sahiblik etdiyi "Vaşinqton Post" qəzetində Tramp əleyhinə olan yazılar idi. İndi texnoloji liderlər Trampın ətrafında birləşməklə, bu maliyyə dəstəklərinin davamlılığını təmin etməyə çalışırlar.Yəni görünən odur ki, qlobal şirkətlərin biznes maraqları, ABŞ-nin yeni dünya düzənində hegemon roulunun gücləndirilməsi, Çin, Avropa və digər bölgələrdə texnoloji rəqabət qabiliyyətini yüksəltmək kimi maraqlar Trampı və texnoloji liderləri bir araya gətirib. Dünənə kimi ABŞ-dəki mövcudluğu sual altında olan “TikTok” rəhbərinin ABŞ-nin siyasi və texnoloji establişmentinə qoşulması isə bir ayrı müzakirə mövzusudur”.

Firuzə Əliyeva

Texnologiya liderlərini Trampın andiçmə mərasiminə gətirən ƏSAS SƏBƏBLƏR