“TikTok” sabahdan bağlana bilər - XƏBƏRDARLIQ!
ABŞ Ali Məhkəməsinin verdiyi qərardan sonra Çin şirkəti yanvarın 19-da Amerika istifadəçiləri üçün “TikTok”u bağlamaq haqqında düşünür.
Sfera.az xatırladır ki, ABŞ Ali Məhkəməsi Çinin “ByteDance” şirkətinə məxsus olan “TikTok”un ABŞ-dəkı fəaliyyətini davam etdirməsi üçün yanvarın 19-na qədər vaxt verib. Həmin tarixə qədər “TikTok”un ABŞ-dəki yayım hüquqi başqa bir arzulanan şəxsə satılmalıdır. Bu qərardan o nəticə çıxır ki, platforma qeyd edilən tarixə qədər satılmasa, ABŞ-də tamamilə qadağan olunacaq.
“TikTok”un ABŞ-də 170 milyondan çox istifadəçisi var. Şirkət bu qədər istifadəçini itirmək istəmirsə, təcili olaraq ABŞ-də alıcı tapmalıdır, əks halda o, proqram mağazalarından və internet provayderlərindən silinəcək.
Ağ Evin bəyanatında deyilir ki, qanunun icrası yanvarın 20-də vəzifəyə başlayacaq Donald Tramp administrasiyasının üzərinə düşür. Tramp daha əvvəl “TikTok”u xilas etməyin bir yolunu tapacağını deyərək istifadəçilərə ümid vermişdi.
Konqresin həm Demokrat, həm də Respublikaçı üzvləri keçən il Çin hökuməti ilə mümkün əlaqələrə görə “TikTok”un qadağan edilməsi lehinə birləşdilər. ABŞ hesab edir ki, “TikTok” əldə etdiyi məlumatları Çin hökuməti ilə paylaşır.
Qanuna görə, “ByteDance” platformanın ABŞ-də fəaliyyətini davam etdirməsi üçün “TikTok”u “neytral tərəfə” satmalıdır. Bu satış baş verməsə, “Apple” və “Google” “TikTok”u tətbiq mağazalarından siləcək və mövcud istifadəçilər təhlükəsizlik yeniləmələrindən məhrum olacaqlar. Bu o deməkdir ki, proqram bir müddət sonra tamamilə yararsız hala düşəcək.
“ByteDance” əvvəllər “TikTok”гт satışını rədd etmişdi.
“TikTok” üçün vaxt daralır. ABŞ-də fəaliyyətini davam etdirmək istəyən “ByteDance” "TikTok"un taleyi ilə bağlı yaxın bir neçə gün ərzində qərar verməlidir.
Vasif
