Bayden Qəzzadakı atəşkəslə bağlı bəyanat yaydı

ABŞ Prezidenti Co Bayden İsrail hakimiyyəti ilə HƏMAS arasında atəşkəs və girovların azad olunmasına dair razılaşma ilə bağlı bəyanat yayıb.

Bəyanat Ağ Evin rəsmi saytında dərc olunub.

Bayden bildirib ki, tərəflər arasında atəşkəsə ölkəsinin həyata keçirdiyi intensiv diplomatiya nəticəsində nail olunub.

Sənədə əsasən, əldə edilən razılaşma Qəzzada hərbi əməliyyatların dayandırılmasına və bölgədə yaşayan fələstinli dinc əhaliyə zəruri humanitar yardımların çatdırılmasına və 15 aydan çoxdur girovluqda saxlanılan şəxslərin öz ailələrinə qovuşmasına şərait yaradacaq.

Ağ Ev rəhbəri xatırladıb ki, 2024-cü il mayın 31-də açıqlanan plan BMT-nin Təhlükəsizlik Şurasında yekdilliklə qəbul edilib.

"Bu, həm HƏMAS-ın üzləşdiyi ekstrimal təzyiqin və Livandakı atəşkəsdən sonra regiondakı qüvvələr arasında tarazlığın bərpası, habelə İranın zəifləməsi, eləcə də ABŞ-nin gərgin və israrlı diplomatiyası nəticəsində mümkün olub. Mənim bu istiqamətdəki diplomatik səylərim heç zaman dayandırılmayıb".

Bayden həmçinin HƏMAS-ın hücumları nəticəsində həlak olanları və onların ailələrini, habelə girovluqda olan ABŞ vətəndaşlarını anıb, onların geri qaytarılacağını bildirib.

Prezident deyib ki, bu istiqamətdə planın təfərrüatları yaxın vaxtlarda açıqlanacaq. /APA