Avropada qazın qiyməti ARTIR: Daha da bahalaşacaq - PROQNOZ
2025-ci il yanvarın əvvəlində Avropada qazın qiyməti əvvəlki ilə nisbətən yüksəkdir. Hazırda 1000 kubmetr qazın qiyməti 500 dollar təşkil edir. Ötən ilin yanvar ayı ilə müqayisədə mövcud qiymət 50% yüksəkdir.
Sfera.az xatırladır ki, 2024-cü ilin yanvarında Avropada qazın gündəlik bazar qiyməti 344-362 dollar təşkil edirdi.
Son aylarda havaların soyuq keçməsi, yeraltı anbarlarda toplanan qazdan daha çox istifadə edilməsi və 2025-ci il yanvarın 1-dən Ukrayna ərazisindən Rusiya qazının tranzitinin azalması qiymətlərə artırıcı təsir edib.
Bunlarla yanaşı, Avropada külək enerjisi istehsalı da azalıb ki, bu da qaza tələbi artırıb. “Gas Infrastructure Europe”un məlumatına görə, 2025-ci il yanvarın 7-də anbar tutumunun səviyyəsi bir il əvvəlki 84,1% ilə müqayisədə 68,8% təşkil edib.
Mövcud vəziyyəti nəzərə alan avropalı ekspertlər proqnozlaşdırır ki, 2025-ci ildə Avropa İttifaqı ölkələrində qazın qiyməti artacaq. Proqnozlara görə, qiymətlər 540-550 dollar həddinə qədər yüksələcək.
Ümumilikdə, bu il qaz qiymətlərinin əvvəlki illə müqayisədə yüksək olacağı təxmin edilir.
Vasif
Sfera.az
