Trampın andiçməsinə rekord həcmdə ianə TOPLANDI - MƏBLƏĞ
ABŞ-nin yeni seçilmiş prezidenti Donald Trampın yanvarın 20-də keçiriləcək andiçmə mərasimi üçün toplanan ianələrin məbləği rekord həddə çatıb.
Sfera.az xarici mediaya istinadən xəbər verir ki, ianələrin ümumi məbləği 170 milyon dolları keçib.
Andiçmə mərasiminə cavabdeh olan komitə yanvarın 20-nə qədər 200 milyon dollardan çox ianə toplanacağını proqnozlaşdırır. Mərasim xərclərindən artıq qalacaq vəsait prezident kitabxanası üçün istifadə ediləcək.
Prezidentin inauqurasiyası üçün alınan ianələr adətən mərasimi əhatə edən paradlar və toplar kimi müxtəlif tədbirlərin xərclərini ödəmək üçün istifadə olunur. Federal Seçki Komissiyasının qeydlərinə görə, Trampın andiçmə komitəsi tərəfindən indiyədək toplanmış ianələr, hazırkı prezident Co Baydenin 4 il əvvəl andiçmə mərasimi üçün toplanan 62 milyon dollardan təxminən üç dəfə çoxdur.
2016-cı ildə Trampın ilk andiçmə mərasiminə isə təxminən 107 milyon dollar bağışlanmışdı. Donorlar arasında ABŞ-nin əsas texnologiya şirkətləri də var. “Amazon” və “Meta” kimi nəhəng şirkətlər keçən ay andiçmə mərasiminin təşkili üçün fonda 1 milyon dollar bağışlayıblar. Süni intellekt “ChatGPT” çatbotunun yaradıcısı “OpenAI” şirkətinin baş direktoru Sam Altman da 1 milyon dollarlıq ianə etməyi planlaşdırdığını açıqlayıb.
Vasif
Sfera.az
