Suriyada Əsəd rejiminin devrilməsindən sonra ölkə ərazisində hələ də vahid dövləti qurmaq mümkün olmayıb.

Sfera.az xəbər verir ki, ölkə ərazisinin böyük hissəsi yeni qurulan siyasi hakimiyyətin nəzarətinə keçsə də, təxminən 30 faizə (50 min kvadrat kilometr) yaxın ərazi YPG/PKK silahlı birləşmələrinin nəzarəti altındadır. Bu ərazidə faktiki olaraq kürd-terror dövləti fəaliyyət göstərir.

Suriyadakı yeni siyasi hakimiyyət YPG/PKK-nın nəzarətində olan bu ərazilərdə də suverenliyini təmin etmək istəyir. Ancaq YPG/PKK qüvvələri bu ərazilərə nəzarətin rəsmi Dəməşqə keçməsini istəmirlər.

Türkiyənin böyük dəstəyinə sahib olan yeni iqtidarın belə vəziyyətdə YPG/PKK nəzarətində olan ərazilərdə hərbi əməliyyatlar keçirməsi ehtimalı yaranıb. Bu ehtimalı yaradan amillərdən biri də Türkiyə dövlətinin mövqeyidir. Rəsmi Ankara Suriya ərazisində vahid dövlətin qurulmasında israr etdiyindən YPG/PKK-yə qarşı hərbi əməliyyatların başlama ehtimalı günbəgün artır.

Çətinə düşən YPG/PKK indi özünə tərəfdaş axtarır.

Hazırda YPG/PKK-nin nəzarətində olan ərazilərdə ABŞ-yə məxsus 2 min əsgər xidmət aparır. ABŞ əsgərlərinin ərazidə olmasının məqsədi məhz YPG/PKK-ya dəstək verməkdir. Amma YPG/PKK-nın nəzarətində olan ərazi böyük olduğundan 2 min amerikalı əsgərin onları müdafiə etmək imkanı yoxdur. Buna görə də, YPG/PKK Fransadan da dəstək almaq istəyir. Fransa siyasi müstəvidə YPG/PKK-nı dəstəkləyir. Rəsmi Paris hesab edir ki, həmin ərazilər hələ bir müddət YPG/PKK nəzarətində qalmalıdır. Lakin Türkiyə YPG/PKK-nı terror təşkilatı kimi tanıdığından və onlar Türkiyə üçün ciddi təhlükəsizlik problemi yaratdığından rəsmi Ankara bu ərazilərdə də vahid Suriya hakimiyyətinin qurulmasında israr edir.

YPG/PKK Türkiyənin israrından narahat olduğu üçün başqa bir təkliflə çıxış edib. Onların fikrincə, ərazi YPG/PKK silahlılarından təmizlənsə də, burada təhlükəsizliyi Suriya ordusu yox, ABŞ və Fransa ordusu təmin etməlidir. YPG/PKK nümayəndələri Avropa ölkələrinin mediasına verdiyi açıqlamada bildiriblər ki, onlar Fransadan hərbsizləşdirilmiş zonanın təhlükəsizliyini təmin etmək, bölgəni qorumaq və kürdlərin Türkiyə ilə yaxşı əlaqələr qurmağına kömək etmək üçün mövcud sərhədlərdə əsgər yerləşdirmələrini istəyiblər.

Məlumdur ki, Fransa Suriyada YPG/PKK-ya daim silah verib və onlara təlimlər keçiblər. Yəni faktiki olaraq Fransa YPG/PKK ilə bərabər hərəkət edir, onlara kömək göstərir. Fransanın burada məqsədi Türkiyəyə daim problem yaratmaqdır. Bu səbəbdən Fransanın əraziyə daha böyük silahlı qüvvə yerləşdirməsini rəsmi Ankaranın qəbul etməsı real görünmür.

Vəziyyəti təhlil edən türkiyəli analitiklər hesab edir ki, YPG/PKK nəzarətində olan ərazidə həm rəsmi Dəməşqi, həm də Ankaranı qane edən şərait təmin olunmasa, Suriyada növbəti müharibə qaçınılmaz olacaq. Ekspertlər bu müharibədə YPG/PKK-nın qalib gəlmək şansının çox zəif olduğunu düşünürlər.

Vasif

Sfera.az

Suriyada yeni müharibə BAŞLAYIR? - PKK Fransadan kömək istədi