Çin şirkəti Türkiyədə avtomobil zavodu açacaq - Razılaşma əldə edildi

Türkiyənin “Doğan Trend Automotive” şirkətinin rəhbəri Kağan Dağtekin Çinin “SAIC Motor” şirkətinin Türkiyədə istehsal müəssisəsi açmaq istədiyini bildirib.

Sfera.az Türkiyə mediasına istinadən xəbər verir ki, adıçəkilən Çin şirkəti MG avtomobil markasının sahibidir. Dağtekinin verdiyi məlumata əsasən, yanvarın 10-da Şanxaydakı görüşlərdən sonra yeni müəssisə ilə bağlı son qərarlar qəbul ediləcək.

Hazırda “Doğan Trend Otomotiv” Türkiyədə MG markalı avtomobillərin satışı üzrə distributor rolunu oynayır. Şirkət yerli istehsalı təşkil etməklə həm Türkiyədə, həm də Avropa və Şimali Afrikada satışların sayını artırmağı hədəfləyir.

Qeyd edək ki, son illərdə Türkiyədə avtomobil müəssisələri açan və ya açmağa hazırlaşan Çin şirkətlərinin sayı artır. Türkiyədə avtomobil sənayesinin inkişaf etməsi, bu sahədə mütəxəsislərin, ehtiyat hissələri istehsal edən müəssisələrin çoxluğu Avropaya, Yaxın Şərq ölkələrinə daha çox avtomobil satmaq istəyən Çin şirkətlərinin marağına səbəb olur.

Vasif

Sfera.az