“Amerikalılar Kapitoliyə hücumu unutmamalıdır” - Co Bayden

Bu gün aksiya iştirakçılarının Kapitoliyə (ABŞ Konqresinin binası - red.) hücumundan 4 il ötür. Dörd il əvvəl yanvarın 6-da respublikaçıların keçirilən mitinqində çoxlu sayda insan Kapitoliyə daxil olaraq binaya ziyan vurub.

Sfera.az xəbər verir ki, ABŞ-nin hazırkı Prezidenti Co Bayden bu tarixi hadisə ilə bağlı açıqlama verib.

“Hər il 6 yanvar 2021-ci il tarixini xatırlamağı özümüzə borc bilməliyik. Bunu demokratiyamızın sınaqdan keçirildiyi və qalib gəldiyi gün kimi xatırlayın”, - Bayden bildirib.

ABŞ-nin hazırkı Prezidenti hakimiyyətin dinc yolla ötürülməsinə qayıtmağa çağırıb və əlavə edib ki, o, yanvarın 20-də seçilmiş Amerika lideri Donald Trampın andiçmə mərasimində iştirak edəcək. Bununla belə, Bayden Trampın hərəkətlərinin demokratiyanı təhdid etdiyini deyib və bunun keçmişdə qalacağına ümid etdiyini bildirib.

Xatırladaq ki, 6 yanvar 2021-ci ildə etirazçılar Baydenin qalib gəldiyi 2020-ci il prezident seçkilərinin nəticələrinin ləğv edilməsi tələbi ilə aksiya keçirmişdilər. Aksiyada iştirak edənlərin bəziləri Kapitoliyə hücum ediblər. Bu hadisələrdən sonra 1500-dən çox şəxsə qarşı ittiham irəli sürülüb, 1000-ə yaxın iğtişaşçıya hökm elan edilib. Onlardan 650-yə yaxını bir neçə gündən 22 ilə qədər həbs cəzası alıb.

Tramp 2024-cü il noyabrın 5-də ABŞ-də keçirilən prezident seçkilərində yenidən qalib gəlib. Trampın andiçmə mərasimi yanvarın 20-də baş tutacaq.

Vasif

Sfera.az