"2024-cü ildə mal ixracatı 2023-cü ilə nisbətən 2,5 faiz artaraq 262 milyard dollara çatıb".

Sfera.az xəbər verir ki, bu sözləri Türkiyə Prezidenti Rəcəb Tayyib Ərdoğan Haliç Konqres Mərkəzində “2024-cü il ixracat rəqəmlərinin açıqlanması proqramı”nda çıxışı zamanı deyib.

Ərdoğan çıxışında 2024-cü ilin dekabrında ixracatın 2,2 faiz artaraq 23,5 milyard dollara çatdığını və bununla da dekabr rekordunu qırdığını bildirib.İdxalın 11,1 faiz artaraq 32,3 milyard dollara çatdığını ifadə edən Ərdoğan qeyd edib ki, il ərzində ixracat rəqəmlərində Cümhuriyyət tarixində rekord qırılıb.

O bildirib ki, 2024-cü ilin yanvar-dekabr dövründə 31 vilayət 1 milyard dollardan çox ixracat həyata keçirib və 54 vilayət ixracatını artırıb:

“Ən çox ixrac edilən 5 vilayət 56,8 milyard dollarla İstanbul, 32 milyard dollarla Kocaeli və 23,8 milyard dollarla İzmir, 18,2 milyard dollarla Bursa və 13,2 milyard dollarla Tekirdağdır".

Ərdoğanın sözlərinə görə, 2024-cü ildə idxal 4,9 faiz azalaraq 344,1 milyard dollara enib:

"2024-cü ildə xarici ticarət balansımızda müsbət qazanc əldə etdik. 2023-cü ildə 106,3 milyard dollar olan xarici ticarət kəsirini 2024-cü ildə 82,2 milyard dollara endirdik. Yəni 2024-cü ildə xarici ticarət kəsirini 24 milyard dollar azaldıb. İxracatın idxalı qarşılama faizi 5,5 bənd artaraq 76,1 faiz təşkil edib. Biz vəzifəyə başladığımız 2002-ci ildə bu göstərici cəmi 50 faiz civarında idi".

Ötən il mal və xidmət ixracatçıları üçün 375 milyard dollar hədəf qoyduğunu xatırladan Ərdoğan 2025-ci ildə ümumi mal və xidmət ixracının 390 milyard dolları keçəcəyinə inandığını qeyd edib.

Firuzə Əliyeva

"Ötən il Türkiyədə ixracat 262 milyard dollara yüksəlib" - Ərdoğan