Qazaxıstan Prezidenti yayılan şayiələri təkzibetdi

Qazaxıstan Prezidenti Kasım-Jomart Tokayev 2026-cı ildə BMT-yə rəhbərlik etməyi planlaşdırması ilə bağlı sosial şəbəkələrdə yayılan şayiələri təkzib edib.

Sfera.az xəbər verir ki, o, bu barədə “Ana tili” qəzetinə müsahibəsində bildirib.

“Mən BMT baş katibinin müavini və Silahsızlanma üzrə Konfransın Baş katibi kimi BMT-nin Cenevrə ofisinə rəhbərlik etməli oldum. Faydalı təcrübə və beynəlxalq proseslərin mexanizmləri haqqında anlayış əldə etdim. Hesab edirəm ki, bu, artıq kifayətdir. Mənim ölkənin uzun illər davam edəcək inkişafı üçün böyük planlarım var və mən onları həyata keçirmək niyyətindəyəm”, - o deyib.

Tokayevin sözlərinə görə, görünməmiş geosiyasi gərginlik şəraitində Qazaxıstan ölkənin təhlükəsizliyinin və dayanıqlı iqtisadi inkişafının təmin edilməsinə sadiqdir.

O həmçinin qeyd edib ki, həm Qərbdə, həm də bütün dünyada Qazaxıstanı orta güc adlandırırlar.

“Bu status, əlbəttə ki, bizi çox işlər görməyə, ilk növbədə, beynəlxalq arenada məsuliyyətli davranmağa, dövrümüzün ən aktual problemlərinə konstruktiv yanaşmağa məcbur edir. Buna əsasan Qazaxıstan “bütün bəşəriyyətin ümumi evi”, qeyri-alternativ və universal təşkilat kimi BMT-nin ardıcıl dəstəkçisi olaraq çıxış edir”, - Qazaxıstan lideri söyləyib.

O qeyd edib ki, əsas məqsədi dövlətin iqtisadi potensialını, suverenliyini və beynəlxalq mövqelərini gücləndirməkdir.

“Prezidentliyimin əvvəlindən bu günə kimi qəbul edilmiş qərarlara və onların nəticələrinə görə tam məsuliyyəti öz üzərimə götürürəm, mən başqa cür işləyə bilmirəm və işləmək də istəmirəm”, - Tokayev fikrini yekunlaşdırıb.