Zəlzələ, daşqın, yanğınlar... - Ötən ilin ən böyük TƏBİİ FƏLAKƏTLƏRİ
2024-cü il yaxşı hadisələrlə yanaşı, dünyanın dörd bir yerində baş verən təbii fəlakətlərlə də yadda qaldı.
Sfera.az ötən ildə çoxsaylı insan tələfatı və xeyli maddi ziyana səbəb olan ən böyük təbii fəlakətlərin siyahısını hazırlayıb.
Zəlzələ
Yanvarın 1-də Yaponiya yaxınlığındakı Noto yarımadasında 7,6 bal gücündə zəlzələ baş verib və 8500-dən çox yeraltı təkanla müşayiət olunub. Ən çox zərər çəkən ərazi İşikava prefekturasıdır. Zəlzələ 7,45 metr hündürlüyündə sunamiyə səbəb olub. Ümumilikdə 462 nəfər ölüb, 1336 nəfər yaralanıb. Təxmini zərər 17 milyard dolları ötüb.
Meşə yanğınları
Fevralın 1-dən 5-dək Çilinin Valparanso bölgəsində baş verən meşə yanğınları nəticəsində azı 137 nəfər ölüb, 200 nəfər itkin düşüb. Yanğınlar 40,000 hektardan çox ərazini əhatə edib və 14,000-dən çox evi məhv edib və ya zədələyib. Çili Prezidenti Qabriel Boric fəlakəti son 14 ilin ən dəhşətlisi adlandırıb. Səlahiyyətlilər yanğınları qəsdən yandırma ilə əlaqələndiriblər.
Anormal İstilik
May ayında rekord istilik dalğası Meksikada ən azı 27 nəfərin həyatına son qoyub, ən çox itki isə San Luis Potosnda qeydə alınıb. Vallesdə temperatur 48°C (118°F) keçib. Həddindən artıq istilər enerji sistemində əhəmiyyətli dərəcədə gərginlik yaradıb, elektrik enerjisinin kəsilməsinə səbəb olub.
Tornadolar
Mayın 19-dan 27-dək ABŞ-nin mərkəzi hissəsində təxminən 240 tornado baş verib. Fırtınalar Texas, Oklahoma, Arkanzas, Kentukki və Alabama ştatlarında dörd uşaq da daxil olmaqla, 21 nəfərin ölümü ilə nəticələnib.
Daşqın
Sentyabr ayında Yagi tayfunu Vyetnam, Myanma, Laos və Taylandda güclü daşqınlara səbəb olub. Ən azı 844 nəfər (Myanmada 433) həlak olub, 2200-dən çox insan yaralanıb.
Qasırğa
Sentyabrın 26-28-də ABŞ-nin cənub-şərqini vuran Helene qasırğası Florida, Corciya, Şimali Karolina və Cənubi Karolina ştatlarında azı 234 nəfərin həyatına son qoyub. Fırtına geniş daşqınlara və əhəmiyyətli dağıntılara səbəb olub. ABŞ səlahiyyətliləri dəymiş ziyanı 120 milyard dollar qiymətləndirib.
Tropik siklon
Dekabrın 7-8-də “Çido” siklonu Hind okeanının cənub-şərqindən Afrika sahillərinə doğru hərəkət edərək, ilk olaraq Mayottaya dəyib. 15-19 dekabr tarixlərində siklon Mozambik, Zimbabve və Malavidən keçib. İlkin məlumatlara görə, ən azı 142 ölüm faktı və 3200-dən çox yaralı olub. Yerli media Mayottada "minlərlə" insanın itkin düşdüyünü, 100 mindən çox evin dağıldığını bildirib.
Firuzə Əliyeva
Sfera.az
