Daha iki ölkə Şengenə qoşulub - Avropa İttifaqına vizasız gedəcəklər

Avropa İttifaqı (Aİ) ölkələrinə vizasız səyahət imkanı verən Şengen zonasına daha iki ölkə qoşulub.

Sfera.az xatırladır ki, Aİ Şurası 12 dekabr 2024-cü ildə qəbul etdiyi qərarla yanvarın 1-dən Bolqarıstan və Rumıniyanı Şengen zonasına qəbul edib.

İki ölkənin azad səyahət zonasına daxil olması üçün kompromisin əldə edilməsi tələb olunurdu. Amma uzun müddət Hollandiya, Macarıstan və xüsusilə də Avstriyanın etirazları səbəbiylə Bolqarıstan və Rumıniyanın üzvlüyü təxirə salınmışdı.

31 mart 2024-cü ildə dəniz və hava yolları ilə Şengen bölgəsinə qoşulan Bolqarıstan və Rumıniya quru sərhədləri üçün bu günə qədər gözləməli olub. Avstriyanın ölkələrdə artan immiqrasiya və korrupsiya səbəbiylə istifadə etdiyi veto Aİ daxilində gərgin diplomatik səylərdən sonra qaldırılıb. Rumıniya və Bolqarıstan 2007-ci ildə Aİ-yə üzv olublar. Aİ Komissiyası 2011-ci ildə hər iki ölkənin Şengen zonasına daxil edilməsini təsdiqləyib.

Bununla belə, üzv dövlətlər arasında təhlükəsizlik və immiqrasiya ilə bağlı davam edən narahatlıqlar bu prosesi xeyli ləngitdi. Şengen zonasına hazırda 23 Aİ-yə üzv dövlət, üstəlik Lixtenşteyn, İslandiya, Norveç və İsveçrə daxildir. Bolqarıstan və Rumıniyanın da qoşulması ilə bölgədəki ölkələrin sayı 29-a çatıb.

Vasif