Kirayəçi tərəfindən ələ keçirilən evini geri qaytarmaq istəyən ev sahibi həbs edilib
Corciya ştatında ev sahibi Laletta Hale kirayəçi tərəfindən işğal edildiyini dediyi evinə qayıtmağa cəhd etdikdən sonra həbs edilib. O, içəri qanunsuz girməkdə ittiham edilib.
Sfera.az bildirir ki, məhkəmənin qərarına görə, Laletta Hale qeyri-qanuni evə daxil olub. O, əvvəllər evinin kilidlərini dəyişdirən qızın əşyalarını da zorla ələ keçirib.
Bir aydır davam edən məhkəmədə hakim kirayəçi Sakemeya Consonun əleyhinə qərar verib. İnsident də məhz ev sahibi qalib gəldikdən sonra evini təmizləmək qərarına gələndə baş verib.
Lakin məhkəmə qərarına baxmayaraq, polis Lalettanın qanunsuz evə daxil olduğunu və qızın əşyalarını zorla apardığını bildirib. Nəticədə qadın saxlanılıb.
Laletta Hale: “Mən gecəni beton döşəmənin üstündə, dəhşətli şəraitdə keçirdim” - deyə bildirib.
Polisin dediyinə görə, Halenin ona Consonu qovmaq hüququ verən imzalanmış sahiblik orderi olmayıb. Öz növbəsində, Conson adlı kirayəçi bildirib ki, ev sahibi gözlənilmədən onu təhdid edən və binanı tərk etməyi əmr edən bir adamla peyda olub.
Hale iddia edir ki, hərəkətlərinin qanuni olduğuna əmin olub, çünki o, müvəqqəti sakinin noyabr ayında məhkəmə qərarından sonra evi tərk etdiyinə inanıb.
Maraqlıdır ki, mövcud vəziyyətə baxmayaraq, Consona qarşı heç bir ittiham irəli sürülməyib.
Bu iş evdə müvəqqəti yaşama ilə bağlı artan problemi vurğulayır. Sakit Okean Hüquq Fondunun hesabatına görə, ştatda belə halların sayı 2017-ci ildən bəri kəskin şəkildə artaraq 2023-cü ildə 198 mülki iddiaya çatıb. Kleyton polisi hələlik məsələ ilə bağlı hər hansı rəsmi şərh verməyib.
Aysel
