Poroşenko seçki istəyənləri TƏNQİD ETDİ: "Ukraynanı itirə bilərik"
“Yaxın vaxtlarda Ukrayna ərazisində seçkilər keçirilməməlidir”.
Sfera.az bildirir ki, bunu Ukraynanın keçmiş prezidenti, Avropa Həmrəyliyi Partiyasının lideri Pyotr Poroşenko deyib. Bu barədə o, “Kanal 5” telekanalına müsahibəsində bildirib. Poroşenko qeyd edib ki, bu, dövləti zəiflədə bilər.
“Hakimiyyətə gəlmək istəyən bəzi uzaqgörən siyasətçilər başa düşmürlər ki, biz bu proseslərə görə Ukraynanı itirə bilərik”, - keçmiş prezident xəbərdarlıq edib.
Poroşenko seçkilərin bərpası tərəfdarlarını tənqid edərək, onları “Rusiyanın informasiya və psixoloji əməliyyatının yayıcıları” adlandırıb. Partiya lideri onu da vurğulayıb ki, gələn il sülhə nail olmaq üçün Ukrayna ABŞ və Avropa İttifaqının dəstəyini təmin etməlidir.
Qeyd edək ki, Ukrayna Konstitusiyasına uyğun olaraq, hərbi vəziyyət dövründə parlamentin səlahiyyət müddətinin uzadılması mümkündür. Lakin sənəddə prezidentin səlahiyyətlərinin uzadılması ilə bağlı müddəalar yoxdur.
Günay Rəsulqızı
