Bayden onların cəzasını yüngülləşdirdi, Tramp ETİRAZ ETDİ
ABŞ Prezidenti Co Baydenin vəzifədən getməsinə bir neçə gün qalmış 37 məhbusun ölüm hökmünü ömürlük həbslə əvəzləməsi Trampı qəzəbləndirib.
Sfera.az bildirir ki, o, bu barədə “Truth Social” sosial şəbəkəsində açıqlama yayıb.
Tramp Baydenin sözügedən qərarının qəbuledilməz olduğunu bildirib və bunun qurbanların ailələrinə hörmətsizlik olduğunu vurğulayıb.
“Co Bayden ölkəmizin 37 ən qəddar qatilinin ölüm hökmünü yüngülləşdirdi. Onların hər birinin törətdiyi cinayətləri eşidəndə onun bu qərarı necə verdiyinə inanmayacaqsınız. Bu, mənasız qərardır. Qurbanların qohumları və dostları hətta daha çox təsirlənirlər, bunun baş verdiyinə inana bilmirlər”, - Tramp yazıb. O, vəzifəyə gəldikdən sonra federal ölüm cəzası tətbiqlərini qətiyyətlə davam etdirəcəyini söyləyib.
ABŞ Prezidenti Co Bayden isə ötən gün verdiyi qərarla bağlı bunları deyib: “Ölüm cəzalarının tətbiqinə qarşıyam. Yeni rəhbərliyin ölüm cəzalarını yenidən başlatmasına vicdanım icazə verməyəcək”.
Federal məhbuslar üçün ölüm hökmlərinin əleyhinə olduğunu bəyan edən Bayden bu cəzaları müvəqqəti dayandırmaq üçün 2021-ci ildə moratorium elan edib. Donald Tramp seçki kampaniyası zamanı isə bildirib ki, narkotik və insan alverçiləri ölüm cəzası almalıdırlar.
Günay
