Hindistan Mərkəzi Bankı dollarlarını satır - SƏBƏB

Hindistanın Mərkəzi Bankı ölkənin milli valyutası olan rupinin daha çox dəyərdən düşməsinin qarşısını almaq üçün dollarla olan ehtiyatlarının bir hissəsini satıb.

Sfera.az xarici mediaya istinadən xəbər verir ki, Hindistan sərmayəçiləri ABŞ istiqrazlarının yüksək gəlirliliyi ilə əlaqədar, Amerikanın qiymətli kağızlarına investisiya qoyuluşunu artırıb.

Eyni zamanda, yerli neft şirkətlərinin də idxalı təmin etmək üçün dollara tələbi yüksəlib. Hər iki amilin təsiri ilə rupidə ucuzlaşma güclənib və bir dollar 85,1 rupiyə çatıb. Dolların rupiyə nəzərən məzənnəsində il ərzində kəskin dəyişiklik olmur.

Son bir ildə dollar hind puluna qarşı 3 faizə yaxın bahalaşıb. Bu bahalaşmanın önəmli hissəsi məhz son bir-iki ayda müşahidə edilib. Rupidə daha çox ucuzlaşmanın baş verməməsi üçün Hindistan Mərkəzi Bankı valyuta bazarına böyük həcmdə dollar çıxartmağa məcbur olub.

Qeyd edək ki, Hindistan iqtisadiyyatı dünyanın ən böyük iqtisadiyyatlarından biridir. İqtisadiyyatda yaradılan nominal ÜDM-nin həcminə görə, Hindistan Yaponiya ilə birgə, ABŞ, Çin və Almaniyadan sonra dördüncü və beşinci yerləri bölüşürlər.

Proqnozlara əsasən, 2030-cu ilə qədər Hindistan dünyanın ən böyük üçüncü iqtisadiyyatına sahib olacaq.

Vasif

Sfera.az