Ötən günlərdə Belçikanın paytaxtı Brüsseldə Avropa İttifaqına üzv ölkələrin xarici işlər nazirlərinin illik toplantısı keçirilib. İttifaqın xarici işlər və təhlükəsizlik üzrə ali nümayəndəsi Kaya Kallasın başçılığı ilə keçirilən iclasın əsas mövzusu Rusiya-Ukrayna müharibəsi, Gürcüstanda siyasi böhran və Suriyada baş verən hakimiyyət dəyişikliyi olub.

Xarici işlər nazirləri Rusiyaya qarşı 15-ci sanksiya paketini qəbul etsələr də, Fransanın vəziyyətdən istifadə edərək irəli sürdüyü növbəti təklifi rədd ediblər. Belə ki, Emanuel Makron Ukraynada müharibə bitəcəyi zaman buraya Avropa İttifaqının müşahidə missiyasını göndərməyi təklif edib. Eston əsilli baş diplomat isə buna etiraz edərək bildirib ki, hələ Ukraynada sülh əldə edilmədən bu məsələni müzakirə etmək tələskənlikdir.

Bununla bağlı Sfera.az-a açıqlama verən siyasi şərhçi Zeynal Əmrəliyev deyib ki, Kaya Kallasın fikirlərində həqiqət var:

“Makronun təklifi əsasında ittifaq Ukraynaya müşahidə missiyası göndərərsə, bu missiyanın üzvləri qızğın müharibə sonrası nəyi müşahidə edəcəklər? Həmin missiyanın normal fəaliyyəti üçün Ukraynada heç bir şərait yoxdur. Təbii ki, bunu Makron və ətrafı da bilir. Ancaq Fransa prezidenti Ermənistanda sınaqdan keçirdiyi taktikanı indi də Ukraynada tətbiq etmək arzusuna düşüb. Qərb hər nə qədər bu müharibədə Kiyevə silah və diplomatik dəstək göstərsə də, Rusiya ilə birbaşa toqquşmaya girməmək üçün Ukraynaya qoşun göndərməyib. Ancaq bu cür təşəbbüs olub və onun ideya müəllifi də məhz Makron idi. NATO və Avropa Birliyi çərçivəsində bu prossesi həyata keçirə bilməyəcəyini görən Fransa prezidenti, ölkəsinin qoşunlarının Ukraynaya göndərməsi barədə qərar vermişdi. Qərb və Rusiya arasında vəziyyəti daha da gərginləşdirməyə xidmət edən və Paris üçün böyük biabrçılıqla nəticələnən bu hadisəyə görə, Makron öz avropalı həmkarlarının da ciddi tənqidinə məruz qalıb. Görünür, Emanuel hələ də bu niyyətindən əl çəkməyib”.

Ekspert bildirdi ki burada əsas məsələ Ukraynaya yerləşdiriləcək Avropa İttifaqının müşahidə missiyasına qarşı tərəfdən hansısa hücumun edilməsinə çalışmaqdır:

“Makronun niyyəti Ukraynadakı müharibənin sərhədlərini genişləndirmək və münaqişənin daha da alovlandırılmasına çalışmaqdır. Özünü Şarl de Qoll səviyyəsində siyasətçi kimi görən, ancaq Fransa tarixinə “ən uğursuz dövlət başçısı” kimi düşən Makronun yeni dünya müharibəsi yaratmaq cəhdi bu dəfə də baş tutmadı”.

Günay Rəsulqızı

Sfera.az

Avropa İttifaqı Makronun “SÖZÜNÜ YERƏ SALDI”: “Ermənistandan sonra, indi də...”