43 yaşlı braziliyalı supermodel Adriana Lima sevgilisi, əyləncə şirkətinin baş direktoru Andre Lemmerslə Kaliforniyanın Santa-Monika şəhərində evlənib. O, əlamətdar hadisəni “İnstaqram” səhifəsində bildirib. Lima hekayələrində səhra fonunda ərinin əlindən tutduğu fotonu paylaşıb. Kamera onun brilyant qaşlı üzüyünü də yaxından çəkib.

Sfera.az bildirir ki, Adriana Lima və Andre Lemmers 2021-ci ildə görüşməyə başlayıblar. Cütlük münasibətlərini uzun müddət gizli saxlayıb. Ötən ilin avqustunda isə onların övladları olub.

“Rəsmi olaraq xanım Lima Lemmers” - deyə model paylaşımına başlıq yazıb.

Cütlük bu yaxınlarda fotonun çəkildiyi ehtimal olunan Əbu-Dabi səfərindən qayıdıb.

2021-ci ilin əvvəlində görüşməyə başlayan Adriana və Andre ilk dəfə Venesiya Film Festivalında cütlük kimi qırmızı xalçada debüt ediblər. Bir il sonra supermodelin üçüncü övladı doğulub. Cütlük körpəyə Cian Lima Lemmers adını qoyub. Mənbələrə görə, onun adı "Maldiv adaları, Baham adaları və Bora Bora kimi yerlərdə dünyanın müxtəlif yerlərində suyun gözəl rənglərindən ilhamlanıb".

Qeyd edək ki, Adriananın keçmiş əri, serb basketbolçu Marko Yariçdən 12 yaşlı Valentina və 9 yaşlı Sienna adlı iki qızı da var.

Xatırladaq ki, Adriana Lima “Victoria's Secret” alt paltarı brendinin ən məşhur “mələk"lərindən biridir. O, 2003, 2007, 2008, 2010 və 2012-ci illərdə məşhur moda nümayişini açıb. Ulduz həmçinin “Giorgio Armani”, “Vera Wang”, “Louis Vuitton”, “Prada”, “Christian Dior” və “Anna Sui” ilə də çalışıb. Ən son olaraq, supermodel “Vogue” və “Marc Jacobs” üçün işlərini paylaşıb. O, oktyabr ayında “Victoria's Secret” şousuna yenidən qayıdıb.

Aynil

Adriana Lima ailə həyatı qurdu - FOTOLAR