ABŞ-ni milyarderlər idarə edəcək - Tramp komandasının SƏRVƏTİ
ABŞ-nin 47-ci prezidenti seçilən Donald Trampın yeni dövrdə işçi komandasına seçdiyi və ya namizədliyini irəli sürdüyü şəxslər sərvətləri ilə diqqət çəkir. Yanvarın 20-də rəsmi olaraq Ağ Evdəki vəzifəsinə başlayacaq Tramp, yeni hökumətində mühüm vəzifələrə seçdiyi adlar arasında ölkənin milyarderləri və multimilyonerləri də var.
Sfera.az xəbər verir ki, Trampın komandasının ümumi sərvəti 400 milyard dollara yaxındır. Trampın irəli sürdüyü şəxslər Senatın təsdiqini alarsa, yeni prezident ABŞ tarixinin ən zəngin administrasiyalarından birini yaratmış olacaq.
Yeni administrasiya üzvlərinin ümumi sərvətinin 9 milyard dolları keçəcəyi gözlənilir. Trampın ilk prezidentliyi dövründə kabinet üzvlərinin ümumi sərvəti 6 milyard dollar idi.
ABŞ-nin Prezidenti Co Baydenin kabinetinin ümumi xalis sərvəti isə cəmi 118 milyon dollar təşkil edir. Tramp komandasının digər üzvlərini də nəzərə alsaq, məlum olur ki, Amerika dövlətini zənginlər idarə edəcək.
Digər üzvlərlə birgə rəhbər heyətin adambaşına düşən sərvətinin orta məbləği 600 milyon dollar olacaq ki, bu məbləğ də orta Amerika ailəsinin sərvətindən 600 dəfə çoxdur.
Trampın komandasında ən varlı adam İlon Mask olacaq. Hökumətin Səmərəliliyi Departamentinin həm-direktoru seçilən İlon Mask 360 milyard dollardan çox sərvətlə Trampın komandasındakı ən varlı adamdır. Seçkilərdən sonra “Tesla”nın səhmlərinin sürətlə bahalaşması ilə Maskın sərvətinin artması diqqət çəkir.
Yeni komandanın ikinci ən zəngin insanı Trampın özüdür. Onun sərvətinin 6,1 milyard dollar olduğu bildirilir.
ABŞ müdafiə nazirinin müavini olacaq Stiven Faynber daha bir milyarderdir. Nazir müavininin sərvəti 5 milyard dollardır.
ABŞ-nin Londondakı yeni səfiri Uorren Stivensin sərvəti 3,4 milyard dollardır. Parisə səfir göndəriləcək Çarlz Kuşner 2,9 milyard dollar, təhsil naziri olacaq Linda Makmaxon 2,6 milyard dollar, ticarət naziri olacaq Hovard Lyutnik 2 milyard dollar, NASA-nin yeni rəhbəri olacaq Cared İsaakman 1,7 milyard dollar, Hökumətin Səmərəliliyi Departamentinin həm-direktoru olacaq Vivek Ramasvami 1 milyard dollar sərvətə sahibdirlər.
Bundan başqa, komandada çoxlu sayda multimilyonerlər (sərvəti 100 milyon dollardan çox olanlar - red.) və milyonerlər də var.
Vasif
Sfera.az
