Qonşularının “nümunəvi həyat yoldaşları” adlandırdığı avstriyalı cütlük böyük qalmaqalın mərkəzindədir.

Sfera.az bildirir ki, cütlük ölkənin pensiya sistemindən 326.000 avrodan çox pul çıxarmaq üçün qanuni boşluqdan istifadə edərək 43 il ərzində 12 dəfə evlənib və boşanıblar.

Belə ki, cütlük dul qadınlara yenidən evləndikdən sonra 27 min avro məbləğində birdəfəlik təzminat almağa icazə verən Avstriya qanunundan istifadə edib. 1981-ci ildə ilk dəfə ayrılan qadın dul pensiyası almağa başlayıb. Ancaq bir il sonra o əri ilə yenidən evlənib. Münasibətlərin "barışmaz fikir ayrılıqları" əsas gətirərək, altı il sonra yenidən boşanıblar. Bu, bir sıra uydurma evliliklərin və boşanmaların başlanğıcı olub.

Hər yeni evlilik təxminən üç il davam edib, lakin istintaq ər-arvadın birlikdə yaşamağa heç vaxt ara vermədiyini müəyyən edib. Onlar ümumi ev təsərrüfatını idarə etməyə və bir çarpayı paylaşmağa davam ediblər. Qonşulardan və qohumlardan olan şahidlər münasibətlərini “ideal evlilik” kimi təsvir ediblər.

Bu sxem, boşanmaların uydurma olmasına baxmayaraq, hər dəfə nikah pozulduqda qadına təzminat almağa imkan verib. Onilliklər ərzində cütlük pensiya fondundan 326 min avrodan çox pul ala bilib.

2024-cü ildə pensiya fondu ödənişdən imtina etdikdə cütlük məhkəmədə qərara etiraz etməyə çalışıb. Bununla belə, Avstriyanın Ali Məhkəməsi mart ayında onların boşluqdan istifadəsinin qeyri-qanuni olduğu barədə qərar çıxarıb. Bundan sonra Qraz polisi cütlüyü ciddi fırıldaqçılıqda ittiham edərək istintaqa başlayıb.

Hazırda cütlük yenidən evlidir, çünki onların sonuncu, 12-ci boşanması rəsmi orqanlar tərəfindən tanınmayıb. Bu məsələyə məhkəmənin son qoyacağı gözlənilir.

Aynil

“Nümunəvi həyat yoldaşları”: Cütlük 43 ildə 12 dəfə evlənib boşanıb