Rusiya Ukrayna torpaqlarının 18,4%-nə nəzarət edir - Yeni STATİSTİKA
Rusiya ordusu 2022-ci ilin fevral ayından bu yana Ukraynada apardığı müharibədə ən böyük ərazi qazancını keçən noyabr ayında əldə edib.
Sfera.az xəbər verir ki, Amerika Birləşmiş Ştatlarında yerləşən Müharibə Araşdırmaları İnstitutunun (ISW) məlumatlarına əsaslanaraq edilən analizə görə, rus silahlı qüvvələri keçən ay 725 kvadratkilometrlik bir ərazini ələ keçirib.
Məlumatlar, rus ordusunun ərazi qazancının demək olar ki, 90%-ni Ukraynanın şərqindəki Donetsk bölgəsində əldə etdiyini göstərib. Ordunun bu bölgədə strateji əhəmiyyətə malik Pokrovsk şəhərinə doğru tədricən irəlilədiyi bildirilir və mənbələrə görə, rus qüvvələrinin Pokrovska olan məsafəsi 5 kilometrdən azdır.
Rusia ordusu, ərazi qazancının əhəmiyyətli bir hissəsini müharibənin ilk aylarında əldə etmişdi. O dövrdə Rusiya, Ukraynanın 45 min 400 kvadratkilometrdən çox torpağını işğal etmiş və paytaxt Kiyevə yaxınlaşmışdı.
Rusiya qüvvələri, 2024-cü ilin əvvəlinə qədər Ukrayna ərazisində ümumilikdə 3 min 500 kvadratkilometr irəliləyiş əldə edib.
2022-ci ilin fevralında başlayan müharibədən bu yana, Rusiya 2024-cü ilin noyabr ayının sonuna qədər ümumilikdə 68 min 50 kvadratkilometr Ukrayna torpağını işğal edib.
Rusiya, 2014-cü ildə ilhaq etdiyi Krım yarımadası və 2022-ci ildən əvvəl Rusiyaya yaxın separatçılar tərəfindən işğal edilən Donbas bölgəsindən də daxil olmaqla, hazırda Ukrayna torpaqlarının 18,4%-nə nəzarət edir.
Əzizə Zeynal
