Suriyada müharibənin şiddəti yenidən artır. Ölkədə iqtidara qarşı müxalif olan qüvvələrdən biri Heyət Təhrir əş-Şam (HTŞ) üç günlük əməliyyatlar sayəsində Suriyanın ikinci ən böyük şəhəri olan Hələbi nəzarətə götürə bilib.

Sfera.az xarici media agentliklərinə istinadən xəbər verir ki, HTŞ yaraqlıları son 10 ildə ilk dəfə Hələbin mərkəzinə çatıb.

Hələbin itirildiyini Suriya hakimiyyəti də təsdiqləyib. Artıq hava limanları və şəhərə daxil olan yollar bağlanıb. Hələbə hücumda HTŞ tək olmayıb, ona müxtəlif silahlı qruplardan dəstək gəlib. Bəzi yaraqlılar Hələbdəki hökumət binalarının içindən görüntülərini paylaşıblar. Silahlıların rəsmi ofislərdə foto çəkdirərək, meydanda Suriya bayrağını endirən görüntüləri də var.

Əsədin əsas müttəfiqi olan Rusiya üsyançıları dəf etmək üçün Dəməşqə əlavə hərbi dəstək verəcəyinə söz verib. Rusiya aviasiyası HTŞ-nin başçılıq etdiyi hücum zamanı yaraqlıların hədəflərini vurub. Hava zərbələri nəticəsində yaraqlıların itki verdiyi qeyd edilib. İki hərbi mənbənin “Reuters” agentliyinə verdiyi məlumata görə, Suriya hökumətinin qüvvələrinə dəstək məqsədilə yeni hərbi texnikanın 72 saat ərzində gəlməsi gözlənilir. Suriya ordusunun üsyançıların daxil olduğu əsas ərazilərdən geri çəkilmək üçün göstərişlər aldığı da bildirilir.

Xatırladaq ki, HTŞ 2016-cı ildə şəhəri tərk etmək məcburiyyətində qalmışdı. Həmin ildə Əsəd Rusiya, İran və regional şiə silahlılarının dəstəyi ilə aylarla davam edən mühasirə və bombardmanlardan sonra şəhəri geri almışdı. İndi isə regionda vəziyyət fərqlidir. Hücumlar zamanı ötən cümə axşamı İran İnqilab Keşikçiləri Korpusunun yüksək rütbəli zabiti öldürülüb. HTŞ komandanlığı altında döyüşən Ceyş əl-İzza silahlı qruplaşmasının yüksək rütbəli komandiri Mustafa Əbdül Cabir bu həftə onların sürətli irəliləyişini Hələb vilayətində İranın dəstəklədiyi qüvvələrin olmaması ilə əlaqələndirib. Komandir bildirib ki, İranın bölgədəki müttəfiqləri Qəzza müharibəsi səbəbindən İsrail tərəfindən vurulub. HTŞ bildirib ki, bu hücum Rusiya və Suriya Hərbi Hava Qüvvələrinin İdlibdə dinc sakinlərə qarşı artan hücumlarına cavabdır. HTŞ-nin iddialarına görə, Türkiyə bu hücuma yaşıl işıq yandırıb. Amma Türkiyə xarici işlər nazirliyinin sözçüsü Öncü Keçeli Türkiyənin regionda sabitliyi pozmaq istəmədiyini bildirib və son hücumların gərginliyin azaldılması razılaşmalarını pozduğunu vurğulayıb. Bu hücum Rusiya ilə Türkiyə arasında 2020-ci ilin martında imzalanan münaqişələrin azaldılması sazişindən sonra ən böyük hücum kimi qeydə alınıb. Kremlin sözçüsü Dmitri Peskov üsyançıların hücumunu Suriyanın suverenliyinin pozulması kimi qiymətləndirib. Ekspertlərin fikrincə, Suriya hakimiyyəti Hələbin itirilməsini qəbul etməsə, regionda münaqişə yenidən güclənəcək.

Vasif

Suriyada müharibə yenidən alovlanır - Müxalif qüvvələr Hələbi ələ keçirdi