Dünyanın ən böyük banklarından biri olan “Bank of China”nın keçmiş rəhbəri Çində edam cəzasına məhkum edilib. Məhkəmə həmçinin Liu Lianggenin bütün əmlakının müsadirə və mülki hüquqlarından məhrum edilməsi barədə qərar çıxarıb.

Sfera.az bildirir ki, Liu Liangge 2023-cü ilin oktyabrından həbsdədir. İstintaq müəyyən edib ki, o, 121 milyon yuandan (16 milyon dollardan) çox rüşvət alıb və qanunsuz olaraq kreditlərin verilməsinə şərait yaradıb.

Hökmə əsasən, ölüm cəzası iki il müddətinə dayandırılıb. O, iki illik möhlətlə ölüm cəzasına məhkum edilib, yəni hökm yalnız bu müddət ərzində növbəti cinayətlər törətdiyi təqdirdə icra ediləcək.

1961-ci il təvəllüdlü Liu 2019-cu ildə Çin Bankının sədri təyin olunana qədər Çin Xalq Bankı və Çin İxrac-İdxal Bankı da daxil olmaqla bank və maliyyə institutlarında çalışıb.

Çinin antikorrupsiya nəzarət orqanı son aylarda maliyyə sektoruna qarşı əməliyyata başlayıb. Bu, ölkənin ən böyük fiqurlarından bəzilərini, o cümlədən oktyabr ayında rüşvət almaqda ittiham olunaraq edam cəzasına məhkum edilmiş Liu və keçmiş mərkəzi bank rəhbərinin müavini Fan Yifeyi hədəf alıb.

Məhkəmə Liunun vəzifəsindən istifadə edərək bir çox insanın vəzifəsini yüksəltdiyini və alınan rüşvətin miqdarının xüsusilə yüksək olduğunu (16 milyon dollar) bildirib.

Məhkəmə bildirib ki, Liu cinayəti dürüst etiraf edib. İş üzrə oğurlanmış pul və əmlakın böyük hissəsi geri qaytarıldığından, ölüm hökmü dərhal icra olunmayacaq.

KİV-in məlumatına görə, Liu Çin İxrac-İdxal Bankında və Çin Bankında işlədiyi müddətdə 3,32 milyard yuandan çox məbləğdə kreditləri təsdiq edərək qanunları pozub. Nəticədə, bu, 190 milyon yuandan çox itki ilə nəticələnib.

Qeyd edək ki, “Bank of China” Çinin ən qədim bankıdır və dövlətə məxsusdur. Bank bazar kapitallaşmasına görə dünyanın ən böyük on bankı sırasındadır.

Son illərdə Çin hakimiyyəti yüksək vəzifəli məmurlar və aparıcı iş adamları da daxil olmaqla, böyük antikorrupsiya kampaniyası aparır. 2024-cü ilin əvvəlindən hökumətin hesabatlarına görə, ümumilikdə 589 mindən çox insan məsuliyyətə cəlb edilib.

Aynil

Çinin ən böyük bankının keçmiş rəhbəri ölüm cəzasına məhkum edildi