Şimali Koreya ballistik raket atdı - Yaponiya TŞ təcili toplandı

Koreya Xalq Demokratik Respublikası (KXDR) bu gün səhər saatlarında Yapon dənizi istiqamətində ballistik raket atıb.

Sfera.az xəbər verir ki, bu barədə Koreya Mərkəzi Xəbər Agentliyi (KCNA) məlumat yayıb.

Bu barədə Yaponiya Müdafiə Nazirliyi də məlumat verib. Yaponiya Nazirlər Kabineti məsələ ilə bağlı Milli Təhlükəsizlik Şurasının təcili iclasını çağırıb.

Nazirliyin ilkin hesablamalarına görə, raket Yaponiyanın Okuşiri adasından təxminən 300 km qərbə, ölkənin müstəsna iqtisadi zonasından kənara düşüb. Onun dik trayektoriya ilə uçan qitələrarası ballistik raket olması ehtimalı var.

"Uçuşun müddəti 86 dəqiqə olub ki, bu, tarixdə ən uzun uçuş dövrüdür, həmçinin hündürlüyün 7000 km-dən çox olduğu təxmin edilir. Biz raketin qitələrarası raket olduğunu güman edirik, onun yeni tip olub-olmadığını müəyyən etmək üçün təhlillərimizi davam etdiririk", - Yaponiyanın müdafiə naziri Gen Nakatani bildirib.

Qeyd edək ki, ən son ballistik raket sınağı 2023-cü ilin dekabrında baş tutub.

Firuzə Əliyeva

Sfera.az