“TikTok”un sahibi Çinin ən varlı adamı oldu - Siyahıda başqa kimlər var?

Çinin ən varlı adamı adına “TikTok”un yaradıcısı və rəhbəri Canq Yiming yiyələnib.

Sfera.az xarici mediaya istinadən xəbər verir ki, Canqın sərvətinin dəyəri 49,3 milyard dollara yüksəlib. Canqın 41 yaşı var və o, 2012-ci ildə qurduğu şirkətin xidmətlərinin genişlənməsi hesabına sərvətini dəfələrlə artıra bilib.

Hazırda “TikTok”un dünya üzrə 200 milyona yaxın istifadəçisi var. Şirkətin qlobal gəlirləri son bir ildə 30 faiz artıb. 2021-ci ildə şirkətin idarəçiliyini təhvil verməsinə baxmayaraq hələ də əhəmiyyətli bir paya sahib olan Canqın şəxsi sərvəti də son bir ildə 43 faiz artıb.

Çinin ikinci ən varlı adamı “Nongfu Spring” təbii bulaq suyu şirkətinin qurucusu və rəhbəri Conq Şanşandır. Onun sərvətinin dəyəri 47,9 milyard dollardır. “Nongfu Spring”ın sahibinin sərvəti bir ildə 24 faiz azalıb.

Çinin aparıcı internet və texnologiya şirkətlərindən biri olan “Tencent”in qurucusu və rəhbəri Pony Ma Huatingin isə sərvəti 44,4 milyard dollara yüksəlib.

Ümumilikdə, Çində sərvətinin dəyəri 700 milyon dollardan çox olan 963 şəxs var. Siyahıda yer alanların ümumi sərvəti 3 trilyon dollara çatır.

Vasif