Putin Pezeşkianı Rusiyaya rəsmi səfərə dəvət edib.

Sfera.az bildirir ki, bu barədə liderlər Aşqabadda baş tutan görüş zamanı danışıblar. Pezeşkian isə dəvəti minnətdarlıqla qəbul edib və bundan yararlanacağına söz verib.

Aşqabadda keçirilən ikitərəfli görüşdə Putin həmçinin qeyd edib ki, Rusiya və İran beynəlxalq arenada birgə fəal işləyirlər. Rusiya liderinin sözlərinə görə, Moskva və Tehranın dünyada baş verən hadisələrə baxışları çox vaxt yaxın olur. Öz növbəsində Pezeşkian da iki ölkə arasındakı münasibətləri dostluq və strateji xarakterli adlandırıb.

“İranla əlaqələr bizim üçün prioritetdir və çox uğurla inkişaf edir. Bu il biz ticarət dövriyyəsinin artımını müşahidə edirik. Düzdür, ötən ilki tənəzzüldən sonra bərpa olunmayıb, lakin tendensiya yaxşıdır”, - Putin qeyd edib.

Bununla bağlı Rusiya mediasına danışan iranlı politoloq və jurnalist Xəyal Müəzzi isə bildirib ki, Putin və Pezeşkian arasındakı görüş İrana ABŞ və müttəfiqləri ilə artan gərginlik fonunda Yaxın Şərqdəki mövqelərini möhkəmləndirməyə kömək edəcək. Onun fikrincə, Rusiya regionda sabitliyin qorunub saxlanmasında mühüm rol oynayır və bu, liderlər arasında ilk təmasın əhəmiyyətini ehtiva edir.

“Tehran üçün İsraillə münaqişə fonunda Moskva ilə əməkdaşlıq xüsusi əhəmiyyət kəsb edir. Rusiyadan hərbi və iqtisadi dəstəyin mümkün genişləndirilməsi İrana artan çətinliklərin öhdəsindən gəlməyə kömək edəcək. Vəziyyətin mürəkkəbliyini nəzərə alsaq, Rusiya və İranın Yaxın Şərq böhranlarının həllində iştirakı olmadan sabit sülhə nail olmaq mümkün deyil”, - politoloq qeyd edib.

Xatırladaq ki, Rusiya Prezidenti Vladimir Putin türkmən şairi və mütəfəkkiri Məqtimqulu Fraqinin 300 illik yubileyinə həsr olunmuş beynəlxalq forumda iştirak etmək üçün Aşqabada gəlib. Forumda Türkmənistan, İran, Pakistan, Qazaxıstan, Özbəkistan, Qırğızıstan, Tacikistan, Ermənistan, Monqolustan dövlət başçıları və Türkiyə parlamentinin sədri də iştirak edir.

Günay

Putinlə Pezeşkian GÖRÜŞDÜ - Nələr müzakirə olundu?