Rusiya Ukraynanın ABŞ-nin gizli razılığı olmadan "Şimal axını" qaz kəmərinə hücum edə biləcəyinə inanmır.

Sfera.az “Reuters”ə istinadən xəbər verir ki, bunu Rusiyanın ABŞ-dəki səfiri Anatoli Antonov deyib.

O bildirib ki, Rusiya hücumun arxasında duranları müəyyən edib cəzalandıracaq:

“Onlar bütün məsuliyyəti öz ukraynalı marionetlərinin üzərinə atmağa çalışırlar. Biz partlayışın əsl günahkarlarını müəyyən etməyə və onları cəzalandırmağa çalışacağıq”.

Xatırladaq ki, 2022-ci il sentyabrın 26-da Baltik dənizinin altından keçən boru kəmərlərində kəskin təzyiq azalması qeydə alınıb və seysmoloqlar partlayışlar aşkar ediblər. Bu isə Rusiya qazını Almaniyaya daşıyan çoxmilyardlıq layihəni kimin sabotaj etməsi ilə bağlı fərziyyə dalğasına səbəb olub. Danimarkanın Bornholm adasında baş verən və sistemin dörd xəttindən üçünü qoparan partlayışa görə məsuliyyəti heç kim üzərinə götürməyib. Rusiya dəfələrlə “Şimal axını”na hücumun ABŞ və Böyük Britaniya tərəfindən həyata keçirildiyini bildirib. Vaşinqton və London isə bu ittihamları rədd ediblər. “The New York Times”, “The Washington Post” və “Wall Street Journal” hücumun arxasında iştirakını dəfələrlə inkar edən Ukraynanın dayandığını bildirib.