Kim Çen In daşqında xilasetmə əməliyyatında iştrak etdi - FOTO
Kim Çen In daşqınlardan zərər çəkmiş sakinləri “xilas etmək” üçün bahalı avtomobildən istifadə edib. O, güclü yağışlar səbəbindən daşqın zonasında olan Şimali Pxenyan bölgəsindən sakinləri xilas etmək üçün özü şəxsən gedib.
Sfera.az bildirir ki, Çinlə həmsərhəd olan bölgə Amnok çayının daşmasından sonra su altında qalıb. Kim tamamilə yeni cipində, xilasetmə əməliyyatına şəxsən rəhbərlik edib.
Xilas edilmiş sakinlər liderlərini gördükdən sonra “təşəkkür göz yaşları töküblər”.
Kim Çen Inın fotosunu dövlət xəbər agentliyi dərc edib. Şəkillərdə onun sakinləri evakuasiya etmək üçün istifadə edilən hərbi helikopterlərin yanından keçdiyi, hərbi qulluqçularla əl sıxışdığı, avtobusda gedən sakinlərə əl yellədiyi, qatlanan kresloda yorğun oturduğu və daha sonra yeni parıldayan, naməlum marka avtomobilin arxa oturacağından fəlakət zonasını müşahidə etdiyi əks olunub.
Şimali Koreya mediasında yayılan xəbərdə deyilir ki, Kim Çen In “əlverişsiz hava şəraitində və fövqəladə vəziyyətlərdə sakinləri xilas edərkən 10-dan çox helikopterin hərəkətinə nəzarət edərək xilasetmə işlərinə şəxsən rəhbərlik edib”.
“Güclü külək və yağışlı havada hava limanında onları gözləyən yoldaş Kim Çen In ilə gözlənilmədən görüşən xilas edilmiş sakinlər o qədər təsirləniblər ki, sonsuz həyəcan və minnətdarlıq göz yaşları tökərək ürəkdən seviniblər”-xəbərlərdə deyilir.
Kim Çen In daşqınlarda yerli rəsmiləri günahlandırıb. Onun sözlərinə görə, qasırğalar və tayfunlar “qarşısıalınmaz təbiət hadisəsi” hesab edilir və səlahiyyətlilər təbii fəlakətlərin qarşısının alınmasını inamla öhdələrinə götürmürlər.
Qeyd edək ki, Şimali Koreya daşqınları Asiyada hökumətlərin və alimlərin texnogen iqlim dəyişikliyi səbəbindən daha çox yayıldığını bildirdiyi, ekstremal hava hadisələrinin səbəb olduğu dağıntı və iqtisadi itkilərlə mübarizə apardığı bir vaxtda baş verir.
Qaemi qasırğasının bölgəni bürüməsi nəticəsində son günlər Asiyanın böyük hissələrini güclü yağış və daşqınlar bürüyüb. Təkcə ötən həftə Filippinin bəzi yerlərində, sonra isə Tayvanda güclü daşqınlar olub, sahilyanı və mərkəzi Çində daşqınlar səngimək bilməyib.
Xanım
Sfera.az
