Ekipaj üzvü qayçı ilə sərnişinlərə hücum etdi
Əslən cənubi afrikalı olan, kruiz gəmi işçisi Ntando Soqoni FBİ tərəfindən həbs edilib. O, sərnişinləri qayçı ilə yaralamaqda ittiham olunur.
Sfera.az bildirir ki, hadisədən cəmi bir neçə saat əvvəl gəminin heyətinə qoşulan işçi bir sərnişin və iki ekipaj üzvünə hücum edib. İnsident “Norwegian Cruise Line” şirkətinə məxsus “Encore” gəmisində baş verib.
Onun hücum etdiyi şəxslər 75 yaşlı qadın və iki mühafizəçi olub. Hücumdan əvvəl 35 yaşlı Ntando xilasetmə qayığını işə salmağa cəhd edib, qaçmağa hazırlaşırmış. Mühafizə ona mane olmağa çalışıb, dərhal müayinə üçün gəminin tibb mərkəzinə aparıblar. Orada Ntando tibbi heyətin əlindən qaçaraq, başqa otağa keçib və qayçı götürərək müayinə olunan yaşlı qadını, eləcə də müdaxilə etməyə çalışan iki mühafizəçini bıçaqlayıb.
Xəsarət alanların heç birinin həyati təhlükəsi yoxdur. Ntando Soqoni FBİ tərəfindən saxlanılıb.
Qeyd edək ki, dəniz və ərazi yurisdiksiyası daxilində təhlükəli silahla hücum ittihamı maksimum 10 il həbs cəzası və 250.000 dollar cərimə nəzərdə tutur.
